काठमाडौँ महानगरपालिकाले जाडो मौसम सुरु भएसँगै वायु प्रदूषणको जोखिम बढ्नसक्ने भन्दै प्लास्टिकजन्य फोहोरमैला नबाल्न सर्वसाधारणसँग आग्रह गरेको छ। चिसो बढ्दै जाँदा हावामा प्रदूषक तत्व थुप्रिने सम्भावना रहने भएकाले महानगरले सावधानी अपनाउन भनेको हो।
महानगरको वातावरण विभागका प्रमुख सरिता राईका अनुसार सवारीसाधनबाट निस्कने धुवाँ, सडक तथा अन्य निर्माणबाट उड्ने धुलो, उद्योग तथा कलकारखानाबाट निस्कने धुवाँधुलो र खुला ठाउँमा प्लास्टिकजन्य फोहोर बाल्दा निस्कने धुवाँ वायु प्रदूषणका मुख्य कारण हुन्। यस्ता काम नगर्न र नगराउन उनले सम्बन्धित सबैलाई आग्रह गरेकी छन्।
प्रदूषित हावाले विशेषगरी बालबालिका, ज्येष्ठ नागरिक, दम र खोकीका बिरामी तथा दीर्घरोगबाट पीडित व्यक्तिलाई बढी असर पुर्याउने भएकाले मापदण्डविपरीतका यस्ता गतिविधिबाट जोगिन महानगरले भनेको छ।
विभागले सवारीसाधन प्रचलित प्रदूषण मापदण्डभित्र रहेर चलाउन, नियमित मर्मतसम्भार गर्न र सवारीबाट हुने प्रदूषण घटाउन भनेको छ। निर्माणजन्य सामग्री सडक तथा फुटपाथमा नथुपार्न पनि आग्रह गरिएको छ।
यस्तै, उद्योग, कलकारखाना तथा अस्पतालले महानगरको प्रदूषण नियन्त्रण मापदण्ड २०८१ ले तोकेको वायु गुणस्तर तथा धुवाँसम्बन्धी मापदण्डभित्र रहेर मात्र सञ्चालन हुनुपर्ने र उद्योगमा वायु प्रदूषण घटाउने उपकरण प्रयोग गर्नुपर्ने विभागले जनाएको छ।
