प्रशान्त महासागरको पानी असामान्य रूपमा तातिन थालेपछि पूर्वी एसियाका देशहरूमा शक्तिशाली आँधी र बाढीको खतरा उल्लेख्य रूपमा बढेको छ। विकसित हुँदै गएको एल निनो प्रणालीले पछिल्ला महिनाहरूमा फिलिपिन्स, ताइवान, चीन र जापानमा ठूलो जनधनको क्षति गराइसकेको छ।
बीबीसीका अनुसार सन् २०२६ मा बनेको एल निनोका कारण यस क्षेत्रमा सामान्यभन्दा बलिया तुफानहरू आइरहेका छन्। पछिल्ला केही महिनामा दर्जनौँ मानिसको ज्यान गएको छ भने प्रमुख विमानस्थलहरू बन्द गर्नुपर्ने अवस्था आएको छ।
गत अक्टोबरमा आएको सुपर टाइफुन चम्पीले ताइवानलाई गम्भीर जोखिममा पारेको थियो। प्रतिघण्टा २९५ किलोमिटरको गतिमा चलेको हावाहुरीसहितको उक्त तुफान पाँचौँ श्रेणीको आँधीसँग तुलना गर्न मिल्ने खालको थियो। ताइवानमा प्रत्यक्ष प्रवेश नगरे पनि यसले भारी वर्षा गरायो र हङकङ, ताइवान तथा जापानमा सयौँ उडान रद्द भए। जापानको ओकिनावा क्षेत्रमा १५ हजार घरमा विद्युत् सेवा अवरुद्ध भयो।
जुनमा जापानतर्फ एकैपटक दुईवटा शक्तिशाली तुफान अघि बढेपछि करिब १० लाख मानिसलाई सुरक्षित स्थानमा सारिएको थियो। जुलाईमा आएको ट्रपिकल स्टर्म नाराले चीनको दक्षिणी क्षेत्रमा बाढी निम्त्याउँदा हजारौँ मानिस विस्थापित भए भने अगस्टमा आएको सुपर टाइफुन डल्फिनले पूर्वी चीनमा बाढी र मानवीय क्षति निम्त्याएको थियो।
जापानको मौसम विज्ञान निकायले निगरानी गर्ने भूमध्यरेखीय प्रशान्त क्षेत्रमा गत महिना समुद्री सतहको तापक्रम सामान्यभन्दा चार डिग्री सेल्सियस बढी पुगेको थियो। सन् १९४९ देखि अभिलेख राख्न थालिएयताकै यो उच्च तापक्रम हो। फिलिपिन्सकी जलवायु विज्ञ आना लिजा सोलिसले प्रशान्त महासागरलाई ज्वरोले तातेको शरीरसँग तुलना गरेकी छन्।
जलवायु विज्ञ राफाएला जेन डेल्फिनो र उनको टोलीको अध्ययनअनुसार तापक्रम बढ्दा फिलिपिन्समा आउने शक्तिशाली तुफानबाट हुने कुल वर्षा २६ प्रतिशतसम्म बढ्न सक्छ। संयुक्त राष्ट्रसंघीय विकास कार्यक्रमले सरकारहरूलाई तत्काल दीर्घकालीन तयारी गर्न चेतावनी दिएको छ।
