चीनको सत्तारुढ कम्युनिस्ट पार्टीका पूर्वपोलिटब्युरो सदस्य मा जिङरुईविरुद्ध घुस लिएको आरोपमा औपचारिक मुद्दा दायर भएको छ। पार्टीबाट निष्कासन भएको एक सातापछि बिहीबार उनीमाथि अभियोग दर्ता गरिएको हो।
मध्य चीनको हुबेई प्रान्तस्थित यिचाङ सहरका सरकारी अभियोजनकर्ताले माले नेतृत्वदायी जिम्मेवारीमा रहँदा असाधारण रूपमा ठूलो रकम घुस लिएको र अरूलाई अनुचित फाइदा पुर्याएको दाबी गरेका छन्। उनीमाथिको छानबिन गत अप्रिलमा सार्वजनिक भएको थियो। त्यतिबेला उनीमाथि पार्टी अनुशासन र राष्ट्रिय कानुनको गम्भीर उल्लङ्घन गरेको आरोप लागेको थियो।
मा चिनियाँ राष्ट्रपति सी जिनपिङले चलाएको भ्रष्टाचारविरोधी अभियानमा कारबाहीमा पर्ने पछिल्ला उच्च अधिकारी हुन्। गत साता सम्पन्न पार्टी केन्द्रीय समितिको पाँचौँ पूर्ण अधिवेशनले अनुशासन थप कडा बनाउने र भ्रष्टाचारविरुद्धको अभियानलाई अझ प्रभावकारी बनाउने प्रस्ताव पारित गरेको थियो। सो बैठकले मासहित ३० भन्दा बढी वरिष्ठ अधिकारीलाई पार्टीबाट हटाउने निर्णयलाई अनुमोदन गरेको थियो। हटाइनेमा यस वर्षको सुरुसम्म सेनाको नेतृत्वमा रहेका एक वरिष्ठ जनरल पनि छन्।
२४ सदस्यीय पोलिटब्युरोबाट पछिल्लो समय मा र दुई सैन्य जनरल गरी तीन जना हटाइएका छन्। विश्लेषकहरूका अनुसार भ्रष्टाचारविरोधी अभियानले भ्रष्टाचार नियन्त्रण गर्नुका साथै राष्ट्रपतिप्रति राजनीतिक निष्ठा सुनिश्चित गर्ने काम पनि गरिरहेको छ।
मा सन् २०२५ सम्म सिन्जियाङ क्षेत्रको कम्युनिस्ट पार्टी प्रमुख थिए। त्यसअघि उनले हङकङसँग सीमा जोडिएको प्रमुख औद्योगिक प्रान्त गुआङ्दोङको गभर्नरका रूपमा काम गरेका थिए। चिनियाँ शासन प्रणालीमा प्रान्तीय गभर्नरभन्दा पार्टी प्रमुखको पद बढी शक्तिशाली मानिन्छ। पेसाले इन्जिनियर रहेका माले स्थानीय सरकारमा प्रवेश गर्नुअघि एयरोस्पेस उद्योगमा काम गरेका थिए।
