भक्तपुर — मध्यपुरथिमि नगरपालिका–१ मा बिहीबार बिहान ट्रकले मोटरसाइकललाई ठक्कर दिँदा एक महिलाको मृत्यु भएको छ।
उपत्यका ट्राफिक प्रहरी कार्यालयका अनुसार सिन्धुपाल्चोकको बाह्रबिसे नगरपालिका–९ की गीता तिमिल्सिना बिहान मोटरसाइकलमा यात्रा गरिरहेका बेला दुर्घटना भएको हो। उनी आँखा अस्पताल क्षेत्रबाट मनोहरातर्फ जाँदै थिइन्। सोही क्रममा जडीबुटीबाट लोकन्थलीतर्फ गइरहेको ट्रकले उनको मोटरसाइकललाई ठक्कर दिएको थियो। ठक्करबाट गम्भीर घाइते भएकी तिमिल्सिनाको उपचारका क्रममा निधन भयो।
प्रहरीले ट्रकको नम्बर ग प्र ०४–००१ प ००४५ र मोटरसाइकलको नम्बर बा प्र ०२–००१ ब ३०१८ रहेको जनाएको छ।
मृतकको साथमा भेटिएको त्रिभुवन विश्वविद्यालयको परिचयपत्रका आधारमा उनको पहिचान खुलेको उपत्यका ट्राफिक प्रहरी कार्यालयका प्रवक्ता एवं प्रहरी उपरीक्षक नरेशराज सुवेदीले जानकारी दिए।
दुर्घटनापछि दुवै सवारीसाधन र ट्रक चालकलाई प्रहरीवृत्त थिमीले नियन्त्रणमा लिएको छ। घटनाबारे थप अनुसन्धान भइरहेको प्रहरीले जनाएको छ।
