मधेस प्रदेशमा गुणस्तरहीन खाद्यवस्तु उत्पादन तथा बिक्री गर्ने १४ जना उद्योगी व्यवसायीविरुद्ध मुद्दा दायर गरिएको छ। चालु आर्थिक वर्ष २०८३/८४ को पहिलो तीन महिनामा गरिएको अनुगमन र नमुना परीक्षणमा कैफियत भेटिएपछि उनीहरूलाई सम्बन्धित जिल्ला अदालत तथा जिल्ला प्रशासन कार्यालयमा मुद्दा दायर गरिएको हो।
खाद्य प्रविधि तथा गुण नियन्त्रण कार्यालय जनकपुरधामका प्रमुख विमलकुमार दाहालका अनुसार मुद्दा चलाइएकामध्ये बारा र पर्साका आठ, सप्तरी र सिरहाका तीन, महोत्तरीका दुई र धनुषाका एक व्यवसायी छन्। उनीहरूमाथि खाद्य स्वच्छता तथा गुणस्तर ऐन, २०८१ अन्तर्गत कारबाही अघि बढाइएको छ।
कार्यालयले सो अवधिमा प्रदेशका विभिन्न जिल्लाबाट १६४ वटा नमुना सङ्कलन गरेको थियो। तीमध्ये पाँच वटाको परीक्षण प्रतिवेदन प्रतिकूल देखिएको थियो। खाद्य स्वच्छता कायम नगर्ने, मिसावट गर्ने, स्वास्थ्यमा हानि पुर्याउने वस्तु उत्पादन तथा बिक्री गर्ने र म्याद गुज्रिएका सामग्री बेच्ने व्यवसायीमाथि कारबाही गरिएको प्रमुख दाहालले बताए।
यसै अवधिमा प्रदेशका ६३२ वटा खाद्य व्यवसायमा संयुक्त अनुगमन गरिएको थियो। अनुगमनका क्रममा ५६ वटा खाद्य उद्योगमा कमजोरी भेटिएपछि उपभोक्ता संरक्षण ऐन, २०७५ अनुसार रु १८ लाख २६ हजार जरिवाना गरिएको छ। कार्यालयले २०५ वटा खाद्य तथा दाना उद्योग र १९५ वटा होटल, रेस्टुरेन्ट तथा क्यान्टिनको निरीक्षण गरेको र उपभोक्ताबाट आएका २७ वटा उजुरी सम्बोधन गरेको जनाएको छ।
तीन महिनाको अवधिमा २६ उद्योगलाई नयाँ अनुज्ञापत्र दिइएको छ भने ६८ उद्योगको अनुज्ञापत्र नवीकरण र ८४ वटा नयाँ उद्योग स्थापनाका लागि सिफारिस गरिएको छ। नमुना परीक्षण, अनुज्ञापत्र र सिफारिससम्बन्धी कामबाट रु १६ लाख २४ हजार १० राजस्व सङ्कलन भएको छ। अनुगमनका क्रममा म्याद गुज्रिएका, लेबल नभएका, सडेगलेका र खान अयोग्य खाद्यवस्तु जफत गरी सरोकारवालाको रोहबरमा नष्ट गरिएको कार्यालयले जनाएको छ।
