काठमाडौं — नेपाल र अस्ट्रेलियाबीच व्यापार विस्तार तथा लगानी बढाउने विषयमा उद्योग, वाणिज्य तथा आपूर्तिमन्त्री दीपककुमार साह र नेपालका लागि अस्ट्रेलियाका राजदूत साइमन अर्न्स्टबीच छलफल भएको छ।
बुधबार काठमाडौंमा भएको भेटमा दुई देशबीचको द्विपक्षीय व्यापार, लगानी प्रवर्द्धन र आर्थिक सहकार्यका सम्भावनाबारे कुराकानी भएको हो। भेटमा दुई देशबीचको मैत्रीपूर्ण सम्बन्धलाई अझ प्रगाढ बनाउँदै आर्थिक साझेदारीका नयाँ सम्भावना अघि बढाउने विषयमा छलफल भएको बताइएको छ।
मन्त्री साहले भोटेकोशी र बुढीगण्डकी क्षेत्रमा आएको बाढीका बेला अस्ट्रेलिया सरकारले दिएको मानवीय सहयोग र सद्भावप्रति धन्यवाद व्यक्त गरेका छन्। अस्ट्रेलियाले बाढीपछिको कठिन घडीमा नेपाललाई देखाएको सहयोगलाई उनले दुई देशबीचको मित्रताको उदाहरणका रूपमा उल्लेख गरे।
आगामी दिनमा नेपाल र अस्ट्रेलियाबीच व्यापार विस्तार तथा पारस्परिक हितका क्षेत्रमा सहकार्य थप सुदृढ बनाउँदै लैजाने विषयमा दुवै पक्षले विचारविमर्श गरेका छन्। छलफलमा दुवै देशका लागि फाइदाजनक क्षेत्र पहिचान गरी साझेदारी अघि बढाउने विषयमा सहमति जुटेको बताइएको छ।
भेटमा दुवै पक्षले दुई देशबीचको आर्थिक सम्बन्धलाई नयाँ उचाइमा पुर्याउन निरन्तर संवाद र सहकार्य आवश्यक रहेको विषयमा जोड दिएका छन्। नेपालमा लगानीका सम्भावना रहेका क्षेत्रमा अस्ट्रेलियाली लगानी आकर्षित गर्ने र दुई देशबीचको व्यापारिक आदानप्रदान बढाउने विषयमा समेत छलफल भएको बताइएको छ।
