काठमाडौं । आगामी डिसेम्बर ९ र १० (मङ्सिर २३ र २४ गते) काठमाडौंको होटल सोल्टीमा ‘नेपाल पूर्वाधार सम्मेलन’ (नेपाल इन्फ्रास्ट्रक्चर समिट) आयोजना हुने भएको छ । नेपाल सरकार, भौतिक पूर्वाधार विकास मन्त्रालय, नेपाल उद्योग परिसंघ (सीएनआई) र नेपाल निर्माण व्यवसायी महासङ्घ (एफक्यान) को संयुक्त आयोजनामा सम्मेलन हुन लागेको हो ।
सम्मेलनअघि आयोजित पत्रकार सम्मेलनमा बोल्दै सीएनआई अध्यक्ष वीरेन्द्रराज पाण्डेले यस पटक करिब १७ अर्ब अमेरिकी डलर बराबरका पूर्वाधार परियोजनाहरू एउटै ढाँचामा प्रस्तुत गरिने जानकारी दिए । उनले स्वदेशी तथा विदेशी लगानीकर्तालाई नेपालका आयोजनामा ढुक्क भएर लगानी गर्न आह्वान गरे ।
यस वर्षको मूल नारा ‘बिल्डिङ फर अ रेजिलेन्ट फ्युचर’ (उत्थानशील भविष्यका लागि निर्माण) तय गरिएको छ । विपद्, आर्थिक सङ्कट तथा नीतिगत उतारचढावका बिच पनि पूर्वाधार दिगो र मजबुत हुनुपर्नेमा जोड दिँदै पाण्डेले उत्थानशीलताका तीन आधार — भौतिक, आर्थिक र संस्थागत — प्रस्तुत गरे । तीन आधारमा विपद् जोखिम मूल्याङ्कन गरेर डिजाइन गरिएको भौतिक पूर्वाधार, ऊर्जा र आपूर्तिमा आत्मनिर्भरता, र सरकार परिवर्तन भए पनि नीतिगत स्थिरता र समयमै निर्णय हुने प्रणाली पर्छन् ।
पाण्डेका अनुसार पूर्वाधारलाई सडक र पुलमा मात्र सीमित नराखी प्रसारण लाइन, सिँचाइ, औद्योगिक क्षेत्र, डिजिटल सञ्जाल र खानेपानीसहितको एकीकृत शृङ्खलाका रूपमा विकास गरिनुपर्छ । ‘भरपर्दो पूर्वाधारले अनिश्चितताको खर्च घटाएर उद्यम विस्तार र रोजगारी सिर्जनामा मद्दत गर्छ,’ उनले भने, ‘१०० अर्ब अमेरिकी डलरको अर्थतन्त्र बनाउने राष्ट्रिय आकाङ्क्षा पूरा गर्न लगानी र उत्पादन क्षमता दुवै बढाउनु अपरिहार्य छ ।’
पहिलो दिन समुद्घाटनसहित चार प्लेनरी सेसन र दोस्रो दिन समानान्तर सत्रहरू हुनेछन् । तयारीका लागि सीएनआईमा ‘एनआईएस सचिवालय’ स्थापना गरी सरकार, लगानी बोर्ड र निजी क्षेत्रका प्रतिनिधिहरू सम्मिलित कार्यदलले काम गरिरहेको छ ।
