काठमाडौं । नक्कली शैक्षिक प्रमाणपत्रका आधारमा शिक्षकको जागिर खाएकी कैलालीकी एक महिलालाई विशेष अदालतले ६ महिनाको कैद सजाय सुनाएको छ । अदालतले उनलाई १० हजार रुपैयाँ जरिवाना पनि तिर्न आदेश दिएको छ ।
दोषी ठहर भएकी महिला नन्दाकुमारी शाही हुन् । विशेष अदालतका अध्यक्ष बासुदेव आचार्य तथा सदस्य हेमन्त रावल र विदुर कोइरालाको इजलासले बिहीबार उनलाई सजाय सुनाएको हो । अदालतले उनीबाट ४०० रुपैयाँ क्षतिपूर्ति शुल्क असुल गरी पीडित राहत कोषमा जम्मा गर्न समेत आदेश दिएको छ ।
शाहीले कैलालीको जानकी गाउँपालिका–३, नयाँ लायकपुर शिविरस्थित श्री मुक्त कमैया बाल संरक्षण प्राथमिक विद्यालयमा २०६६ साल मंसिर ३ गते बालविकास शिक्षक पदमा नियुक्ति लिएकी थिइन् । नियुक्तिका क्रममा उनले भारतको उत्तर प्रदेश माध्यमिक शिक्षा परिषद्बाट सन् १९९५ मा जारी भएको भनिएको हाइस्कुल परीक्षाको अंकपत्र पेस गरेकी थिइन् । उक्त अंकपत्रको अनुक्रमाङ्क १२५७७४६ र क्रमाङ्क ६१८७४७२ रहेको थियो ।
अख्तियार दुरुपयोग अनुसन्धान आयोगले राष्ट्रिय परीक्षा बोर्ड, सानोठिमीमार्फत भारतको प्रयागराजस्थित परिषद्को क्षेत्रीय कार्यालयसँग उक्त प्रमाणपत्रको जाँच गराएको थियो । भारतीय कार्यालयबाट आएको जवाफमा उक्त अनुक्रमाङ्क परिषद्बाट जारी नै नभएको उल्लेख थियो । त्यसपछि प्रमाणपत्र नक्कली रहेको पुष्टि भएको थियो ।
अदालतमा बयान दिँदा शाहीले नियुक्ति लिँदा उक्त प्रमाणपत्र पेस नगरेको दाबी गरेकी थिइन् । तर जानकी गाउँपालिकाको गाउँकार्यपालिकाको कार्यालयले पठाएको पत्रबाट उनले सोही अंकपत्र पेस गरेरै नियुक्ति लिएको देखिएको अदालतले जनाएको छ ।
अदालतले शाहीले भ्रष्टाचार निवारण ऐन, २०५९ को दफा १६ को उपदफा (१) को खण्ड (छ) बमोजिमको कसुर गरेको ठहर गरेको हो । सोही व्यवस्थाअनुसार उनलाई ६ महिना कैद र १० हजार रुपैयाँ जरिवानाको फैसला गरिएको हो ।
