नेपाल प्रहरीले दीपावली, नेपाल संवत् र छठ पर्वका अवसरमा देशभर विशेष सुरक्षा योजना कार्यान्वयनमा ल्याएको छ। चाडपर्वको समयमा शान्ति सुरक्षा कायम राख्दै चोरी, ठगी, लुटपाट र जुवातासजस्ता अवाञ्छित गतिविधि नियन्त्रण गर्न प्रहरी परिचालनलाई थप तीव्र बनाइएको हो।
केन्द्रीय प्रहरी प्रवक्ता तथा प्रहरी नायब महानिरीक्षक अबिनारायण काफ्लेका अनुसार सीमा नाका, भन्सार क्षेत्र, सार्वजनिक यातायात र मुख्य बजारमा विशेष चेकजाँच तथा अनुगमन टोली खटाइएको छ। पटकालगायत विस्फोटक पदार्थको अवैध ओसारपसार, भण्डारण र बिक्रीवितरण रोक्न प्रहरी सक्रिय रहेको उहाँले बताउनुभयो। जुवातास, सट्टेबाजी तथा अन्य आपराधिक गतिविधि हुन सक्ने स्थानमा सादा पोसाकमा समेत प्रहरी परिचालन गरिएको छ।
प्रहरीले देउसीभैलो कार्यक्रम स्थानीय प्रशासनले तोकेको समयभित्र मर्यादित रूपमा सञ्चालन गर्न आग्रह गरेको छ। पटका तथा आतिशबाजीबाट हुन सक्ने आगलागी र दुर्घटना रोक्न दमकल तथा विपद् व्यवस्थापन टोलीलाई २४ सै घण्टा तयारी अवस्थामा राखिएको छ।
तिहारमा पटका नपड्काउन, बालबालिकालाई विस्फोटक पदार्थबाट टाढा राख्न, मादक पदार्थ सेवन गरी होहल्ला नगर्न र सुरक्षित तथा सभ्य रूपमा पर्व मनाउन प्रहरीले सर्वसाधारणलाई अनुरोध गरेको छ। आगलागी वा दुर्घटना भए तत्काल प्रहरी कार्यालय वा दमकलमा खबर गर्न तथा अवैध पटका कारोबारबारे प्रहरीको हटलाइन १०० मा जानकारी गराउन पनि आग्रह गरिएको छ।
यसैगरी चाडपर्वका बेला हुन सक्ने कालोबजारी, कृत्रिम अभाव, अस्वाभाविक मूल्यवृद्धि र उपभोक्ता ठगी नियन्त्रण गर्न वाणिज्य विभाग, स्थानीय तह तथा जिल्ला प्रशासनसँगको समन्वयमा बजार अनुगमन तीव्र बनाइएको छ। काठमाडौँ उपत्यकाबाट बाहिरिने सवारीसाधनका चालकको लाइसेन्स, मादक तथा लागूपदार्थ सेवन, यात्रु क्षमता, दुई चालकको व्यवस्था र सवारीको यान्त्रिक अवस्था पनि जाँच गरिने प्रहरीले जनाएको छ।
प्रहरीले सूचना प्रविधि र नागरिक सहकार्यलाई प्राथमिकतामा राख्दै चाडपर्व शान्तिपूर्ण रूपमा मनाउन सबैमा आग्रह गरेको छ।
