पर्सा — भन्सार छली गरेर ल्याइएको ठूलो परिमाणको माछासहित एउटा ट्रक प्रहरीले वीरगन्जबाट नियन्त्रणमा लिएको छ। बरामद गरिएको माछाको मूल्य ३२ लाख ११ हजार ३९२ रुपैयाँ रहेको प्रहरीले जनाएको छ।
बिहीबार वीरगन्ज महानगरपालिका–२५ स्थित आइजिपी सडकखण्डमा जाँचका क्रममा उक्त ट्रक रोकिएको थियो। जिल्ला प्रहरी कार्यालय, वडा प्रहरी कार्यालय श्रीपुर र प्रहरी चौकी सिर्सियाबाट खटिएको संयुक्त टोलीले विशेष सूचनाका आधारमा ट्रकको जाँच गरेको हो।
जाँचका क्रममा ट्रकमा भन्सार प्रज्ञापनपत्रमा उल्लेख भएभन्दा धेरै माछा फेला परेको छ। कागजातमा ९६ क्यारेट माछा उल्लेख गरिएको थियो, तर ट्रकमा थप ४४ क्यारेट माछा भेटिएको प्रहरीले बताएको छ।
प्रहरी नायब उपरीक्षक चक्रबहादुर मल्लका अनुसार कागजातमा उल्लेख भएभन्दा बढी सामान भेटिएपछि ट्रक नियन्त्रणमा लिइएको हो।
ट्रकका चालक वीरगन्ज महानगरपालिका–२१ का २३ वर्षीय रविकुमार साहलाई ट्रकसहित नियन्त्रणमा लिइएको छ। थप अनुसन्धान तथा आवश्यक कारबाहीका लागि चालक र ट्रकलाई बिहीबार नै वीरगन्ज भन्सार कार्यालयमा बुझाइएको प्रहरीले जनाएको छ।
प्रहरीका अनुसार ट्रकमा फेला परेको माछा र चालक दुवैलाई आवश्यक कारबाहीका लागि भन्सार कार्यालयको जिम्मा लगाइएको छ।
