काठमाडौं । नेपाल प्रहरीको महानिरीक्षकबाट प्रधानमन्त्रीको सुरक्षा सल्लाहकारमा सरुवा भएका दानबहादुर कार्कीले दायर गरेको रिट निवेदन दर्ता हुने वा नहुने भन्ने टुंगो आज लाग्ने भएको छ । सर्वोच्च अदालतको प्रशासनले बिहीबार उक्त रिट अध्ययनका लागि राखेको थियो ।
बुधबार सरकारले कार्कीलाई प्रहरी प्रमुखको जिम्मेवारीबाट हटाएर डा. मनोजकुमार केसीलाई नयाँ महानिरीक्षक नियुक्त गर्ने निर्णय गरेको थियो । सो निर्णयविरुद्ध कार्की रिट लिएर सर्वोच्च पुगेका थिए ।
कार्की निकट अधिवक्ता टिकाबहादुर कुँवरका अनुसार सर्वोच्च प्रशासनले रिट अध्ययन गर्न समय लाग्ने भन्दै बिहीबार दर्ता गरेन । आज शुक्रबार प्रशासनले रिट दर्ता गर्ने वा नगर्ने भन्ने निर्णय गर्ने अपेक्षा गरिएको छ ।
यसैबीच मन्त्रिपरिषद्को निर्णयअनुसार डा. मनोज केसीले बुधबारदेखि नै प्रहरी प्रमुखको जिम्मेवारी सम्हालिसकेका छन् ।
यदि रिट शुक्रबार दर्ता भएमा त्यसको प्रारम्भिक सुनुवाइ तिहार बिदापछि मात्र हुने बताइएको छ । सर्वोच्चको निर्णयपछि यो प्रकरणले कस्तो मोड लिन्छ भन्ने चासो बढेको छ ।
