मध्यावधि निर्वाचनमा रिपब्लिकन पार्टीले ठूलो हार बेहोरेपछि अमेरिकी राष्ट्रपति डोनाल्ड ट्रम्पले इरानविरुद्ध जारी सैन्य कारबाहीको बचाउ गरेका छन्। उनले उक्त कारबाहीलाई युद्ध भन्न अस्वीकार गर्दै यसलाई नाकाबन्दीको सफल अभियानका रूपमा प्रस्तुत गरे।
ट्रम्पले अमेरिकी अभियानले इरानलाई गम्भीर क्षति पुर्याएको दाबी गरे। उनका अनुसार इरान त्यसबाट उँभो लाग्न २५ देखि ३० वर्षसम्म लाग्न सक्छ। उनले अभियान प्रभावकारी रूपमा अघि बढिरहेको बताउँदै केहीले यसलाई कब्जाजस्तै ठानेको उल्लेख गरे। ‘यो लगभग कब्जाजस्तै हो, हामी कुनै चालबाजी गर्न खोजिरहेका छैनौँ,’ उनको भनाइ थियो।
यसैबीच ट्रम्पले रक्षा मन्त्री पीट हेगसेथले केही वरिष्ठ सैन्य जनरललाई पदबाट हटाएको विषयमा पनि बोले। जनरलहरू विरोधको सामना गरिरहेका हुन सक्ने उनको भनाइ थियो। हेगसेथ प्रशासनबाट बाहिरिन लागेको भन्ने समाचारका बीच उनको यो प्रतिक्रिया आएको हो।
इरानसँगको कारबाहीका क्रममा १८ अमेरिकी नागरिकको मृत्यु भएको विषयमा ट्रम्पले उक्त सङ्ख्या धेरै भएको स्वीकार गरे। तर भियतनाम र अफगानिस्तान युद्धमा हजारौँ अमेरिकी सैनिक मारिएको स्मरण गर्दै उनले आफ्नो भनाइ राखे। निर्वाचनको हारपछि ट्रम्प प्रशासनको विदेश तथा रक्षा नीतिमाथि प्रश्न उठिरहेका बेला उनले अभियानको बचाउ गरेका हुन्।
