तिहार र छठ पर्वका लागि चाहिने भाइमसला किन्न चालु आर्थिक वर्षको पहिलो तीन महिनामै झन्डै साढे दुई अर्ब रुपैयाँ विदेशिएको छ। भन्सार विभागको तथ्याङ्कअनुसार ओखर, बदाम, नरिवल, काजु र किसमिस गरी पाँच थरी सुक्खा फलफूल आयातमा २ अर्ब ४४ करोड १४ लाख रुपैयाँ खर्च भएको छ भने त्यसबाट सरकारले ५९ करोड ३३ लाख रुपैयाँ भन्सार राजस्व उठाएको छ।
रकमका हिसाबले सबैभन्दा ठूलो हिस्सा ओखरको छ। तीन महिनामा १५ लाख २५ हजार किलोभन्दा बढी ओखर भित्रिँदा ६५ करोड ४० लाख रुपैयाँ बाहिरिएको छ। ओखर मुख्य गरी चीन र अमेरिकाबाट आउने गरेको छ। परिमाणका हिसाबले भने नरिवल अगाडि छ — १ करोड १४ लाख किलोभन्दा बढी नरिवल आयात हुँदा ५६ करोड ६१ लाख रुपैयाँ खर्च भएको छ र यो पूर्ण रूपमा भारतमा निर्भर छ।
बदाम आयातमा ४७ करोड ९३ लाख, काजुमा ४६ करोड ५७ लाख र किसमिसमा २७ करोड ६३ लाख रुपैयाँ खर्च भएको छ। बदामको मुख्य स्रोत अमेरिका हो भने काजु भारत र भियतनामबाट आउँछ।
गत आर्थिक वर्षभरिमा यस्ता वस्तुको आयात ४ अर्ब ४४ करोड रुपैयाँ पुगेको थियो। त्यसको तुलनामा यस वर्षको पहिलो तीन महिनामै गत वर्षको कुल आयातको आधाभन्दा बढी रकम बराबरको सामान भित्रिसकेको छ, जसले चाडपर्वमा विदेशी सुक्खा फलफूलप्रतिको निर्भरता कति गहिरो छ भन्ने देखाउँछ।
