सिरहाको मिर्चैयामा लागुऔषधसहित दुई जना युवालाई प्रहरीले नियन्त्रणमा लिएको छ। बिहीबार राति मिर्चैया नगरपालिका–६ को कटारी चोक क्षेत्रमा भएको जाँचका क्रममा उनीहरू पक्राउ परेका हुन्।
पक्राउ पर्नेमा मिर्चैया–५ का २७ वर्षीय कृष्णकुमार यादव र कल्याणपुर नगरपालिका–४ का २० वर्षीय सुरेन्द्र यादव छन्। उनीहरू सवार मोटरसाइकललाई शङ्का लागेर रोक्न खोज्दा चालक भने मोटरसाइकल छाडेर भागेका थिए। त्यसपछि पछाडि सवार दुवै जनालाई नियन्त्रणमा लिएर जाँच गर्दा ब्राउन सुगरजस्तो देखिने पदार्थ फेला परेको प्रहरीले जनाएको छ।
जिल्ला प्रहरी कार्यालय सिरहाका प्रवक्ता एवं प्रहरी नायब उपरीक्षक रमेशबहादुर पालका अनुसार प्लास्टिकसहित १३ दशमलव ०७ ग्राम र प्लास्टिकबाहेक १० दशमलव ३९ ग्राम पदार्थ बरामद भएको छ। साथै उनीहरूको साथबाट चार हजार रुपैयाँ नगद, दुई थान स्क्रिन टच मोबाइल र एउटा डिजिटल तराजु पनि फेला परेको छ।
इलाका प्रहरी कार्यालय मिर्चैया र लागुऔषध नियन्त्रण ब्युरोको गोलबजारस्थित शाखा कार्यालयबाट खटिएको संयुक्त टोलीले गोप्य सूचनाका आधारमा उनीहरूलाई नियन्त्रणमा लिएको हो। बरामद सामग्री र मोटरसाइकलसहित दुवै जनालाई इलाका प्रहरी कार्यालय मिर्चैयामा राखेर थप अनुसन्धान भइरहेको छ। फरार चालकको खोजी तथा पहिचान गर्ने काम पनि जारी रहेको प्रहरीले जनाएको छ।
