काठमाडौँ । देशभर हजारौँ क्षयरोगी पहिचानबिना नै बसेको र यसले सङ्क्रमण तीव्र गतिमा फैलाइरहेको भन्दै प्रतिनिधिसभा अन्तर्गतको शिक्षा, स्वास्थ्य तथा सूचना प्रविधि समितिका सभापति डा. ओजस्वी शेरचनले द्रुत स्क्रिनिङ र अत्याधुनिक निदान उपकरणको तत्काल आवश्यकता औँल्याएकी छन् ।
डा. शेरचनका अनुसार कुल क्षयरोग बिरामी र मृत्यु हुनेमध्ये झन्डै ६५ प्रतिशत पुरुष छन् । सरकारी तथ्याङ्कले अस्पतालमा दर्ता भएका बिरामी मात्र समेट्ने भएकाले समाजमा लुकेर बसेका बिरामीहरूको वास्तविक संख्या अझ ठूलो रहेको उनको भनाइ छ ।
इन्डोनेसियाको बालीमा नोभेम्बर ३ देखि ५ सम्म आयोजित एसिया–प्रशान्त क्षेत्रीय स्वास्थ्य तथा वित्त समितिका सभापतिहरूको बैठकमा सहभागी भएर स्वदेश फर्किएपछि उनले यस्तो धारणा सार्वजनिक गरेकी हुन् । उक्त बैठक ग्लोबल टीबी ककस र ग्लोबल हेल्थ ककसको संयुक्त आयोजनामा सम्पन्न भएको थियो ।
बैठकमा लक्षण नदेखिएका बिरामीसमेत पत्ता लगाउन सक्ने एआई–पावर्ड चेस्ट एक्स–रे र उच्च जोखिममा रहेका समुदायमा तत्काल स्क्रिनिङ गर्न सकिने नियर पीओसिटि प्रविधिको प्रयोगबारे गहन छलफल भएको थियो ।
विभिन्न देशका सांसदहरूबिच स्वास्थ्य अभियानका लागि अर्थ मन्त्रालयबाट पर्याप्त बजेट सुरक्षित गर्न आइपर्ने व्यावहारिक कठिनाइबारे पनि विमर्श भएको थियो ।
भ्रमणका क्रममा डा. शेरचनले इन्डोनेसियाका स्वास्थ्य मन्त्री बुदी गुनादी सादिकिनले आयोजना गरेको दिवा भोजमा सहभागिता जनाइन् भने इन्डोनेसियाका अर्थमन्त्री सुहासिल नजरा र ग्लोबल टीबी ककसका अध्यक्ष एवं बेलायतको हाउस अफ लर्ड्सका सदस्य लर्ड निक हर्बर्टसँग छुट्टाछुट्टै शिष्टाचार भेट गरिन् ।
