२० कात्तिक, चितवन । राष्ट्रिय स्वतन्त्र पार्टी (रास्वपा) का सभापति रवि लामिछानेले निर्वाचनको सफलतापछि पार्टीका नेता तथा कार्यकर्तामा अहंकार पसेको भन्दै आत्मआलोचना गरेका छन्। शुक्रबार चितवनमा आयोजित कार्यक्रममा उनले पार्टीभित्रको मनोवृत्ति सच्चिनुपर्नेमा जोड दिए।
लामिछानेले जनताले विश्वास गरेर ठूलो जिम्मेवारी दिए पनि पार्टीका कतिपय नेता–कार्यकर्ता अहिले वास्तविकताबाट टाढा पुगेको टिप्पणी गरे। उनले सफलताको नशामा मान्छेलाई मान्छे नगन्ने अवस्था आएको भन्दै यस्तो प्रवृत्ति कुनै हालतमा स्वीकार्य नहुने बताए।
उनले चुनाव जितेपछि प्रशासन र प्रहरीमाथि दबाब दिएर विगतको बदला लिने सोच त्याग्न पनि निर्देशन दिए। विगतमा रास्वपाका साथीहरूले प्रशासनबाट दुःख पाएको स्मरण गर्दै उनले एउटा चुनाव जितेकै भरमा आफूलाई अरूभन्दा माथि ठान्न नहुने बताए।
पार्टीको छोटो अवधिको सफलतालाई उनले सीधै कक्षा ८ मा भर्ना हुनुसँग तुलना गरे। उनका अनुसार छुटेका पाठ नपढी अर्को कक्षामा पुग्न सकिँदैन, त्यसैले पार्टीले राजनीतिक प्रशिक्षण र अनुशासनमा ध्यान दिनुपर्छ।
विश्लेषक तथा सञ्चारमाध्यमको आलोचनालाई ऐनाका रूपमा लिनुपर्ने उनको भनाइ थियो। आलोचना गर्नेहरूलाई दोष दिनुको साटो आफैं सच्चिएर जनताको अपेक्षाअनुसारको राजनीतिक चरित्र देखाउनुपर्ने उनले बताए।
