२० कात्तिक, काठमाडौं । ओमानमा जारी एसीसी यू–१९ एसिया कपमा नेपालले पहिलो खेलमै भारतसँग १० विकेटको फराकिलो हार बेहोरेको छ। ओसिए ग्राउन्ड वानमा शुक्रबार भएको समूह ए को खेलमा नेपाल ब्याटिङ र बलिङ दुवैतर्फ कमजोर देखियो।
पहिले ब्याटिङ गरेको नेपाल ४२.३ ओभरमा १२८ रनमै अलआउट भयो। दर्श सोनारले सर्वाधिक ४३ रन बनाए भने विकेटकिपर आशिष लुहारले २९ र ओपनर निरज कुमार यादवले २० रन जोडे। बाँकी ब्याटरमध्ये कसैले पनि दोहोरो अंक पार गर्न सकेनन्।
भारतका इशान सुद र अर्जुन राजपुतले ३–३ विकेट लिए भने भुत्कुरी यसभिर गौडले २ विकेट हात पारे।
१२९ रनको सामान्य लक्ष्य भारतले १९.१ ओभरमा कुनै विकेट नगुमाई पूरा गर्यो। अविजित रहेका आर्यविर सेहवागले ५२ बलमा ७ चौका प्रहार गर्दै ७२ रन बनाए। कप्तान तथा ओपनर लक्ष्य राईचन्दनीले ६३ बल खेल्दै ७ चौकासहित ५२ रन जोडे।
हारपछि नेपालले अब दोस्रो खेल आइतबार युएईसँग खेल्नेछ।
नेपालको ब्याटिङ इनिङ्समा कुनै साझेदारी लामो बन्न सकेन, जसले टोलीलाई सुरुदेखि नै दबाबमा पार्यो। भारतका ओपनरहरूले सुरुआतदेखि नै आक्रामक ब्याटिङ गर्दै नेपालका बलरलाई कुनै मौका दिएनन्।
