काठमाडौं — पर्यटक भिसामा नेपाल आएर भिसाको मर्मविपरीत काम गरेको आरोपमा १० जना विदेशी नागरिकलाई नेपालबाट निष्कासन गर्ने निर्णय भएको छ। अध्यागमन कानुन उल्लङ्घन गरेको ठहर गर्दै उनीहरूमाथि जनही ५० हजार रुपैयाँ जरिवाना तोकिएको छ। साथै तीन वर्षसम्म नेपाल फर्किन नपाउने गरी उनीहरूमाथि प्रवेश प्रतिबन्ध लगाइएको छ।
उनीहरू मोरङको कानेपोखरी गाउँपालिका–७ बरगाछीमा रहेको मर्सी डेभलपमेन्ट नामक संस्थाले आयोजना गरेको कार्यक्रममा सहभागी हुन आएका थिए। कार्यक्रममा उनीहरूको सहभागिता पर्यटक भिसाको उद्देश्यसँग मेल नखाने देखिएपछि अध्यागमन अधिकारीहरूले छानबिन गरेका थिए। छानबिनपछि कानुन उल्लङ्घन भएको निष्कर्ष निस्किएको हो।
निष्कासनमा पर्नेहरूमा संयुक्त राज्य अमेरिकाका पाँच, ब्राजिलका दुई र क्यानडाका तीन जना नागरिक छन्। उनीहरूमध्ये एक जना नाबालक पनि छन्। नाबालकलाई भने उनका आमाबुवासँगै नेपालबाट प्रस्थान गराइने निर्णय भएको छ।
अध्यागमन कानुनले पर्यटक भिसामा आएका व्यक्तिलाई भिसाको उद्देश्यभन्दा बाहिर गएर कुनै पनि काम गर्न निषेध गर्छ। कानुन उल्लङ्घन गरेमा जरिवानासहित निष्कासन र निश्चित अवधिसम्म प्रवेश प्रतिबन्धको व्यवस्था छ। निर्णयअनुसार उनीहरूलाई तोकिएको जरिवाना तिराएर नेपालबाट बाहिर पठाइनेछ भने तीन वर्षको प्रतिबन्ध अवधिभर उनीहरूले नेपाल प्रवेशका लागि भिसा पाउने छैनन्।
