लुम्बिनी विकास कोषको उपाध्यक्षमा आनी छोइङ डोल्मासहित गरिएको नियुक्तिको विरोधमा बुटवलमा प्रदर्शन भएको छ। लुम्बिनी बचाउ महाअभियानले शुक्रबार बुटवलको पर्सा चोकबाट मौन जुलुस निकालेर कोषको कार्यालयअगाडि कोणसभा गरेको हो।
कोणसभामा बोल्दै महाअभियानका संयोजक अकरम खाँले विधि र प्रक्रिया मिचेर गरिएको नियुक्ति सुशासनविपरीत भएको बताए। उनले नियुक्ति तत्काल बदर गर्न माग गर्दै आनी विदेशी र विवादित नागरिक भएकाले उनको नियुक्ति कुनै हालतमा मान्य नहुने बताए। नागरिकतासम्बन्धी सामान्य विवादमा राष्ट्रिय स्वतन्त्र पार्टीका सभापति रवि लामिछानेको सांसद पद खारेज भएको स्मरण गर्दै उनले त्यही पार्टी सरकारमा रहेका बेला विवादित व्यक्तिको नियुक्ति भएपछि स्थानीयबासी आन्दोलनमा उत्रिनुपरेको बताए।
महाअभियानका सहसंयोजक मेघनाथ आचार्यले सक्षम र निष्पक्ष विज्ञहरूलाई पन्छाएर विकास कोषलाई राजनीतिक भर्ती केन्द्र बनाइएको आरोप लगाए। लुम्बिनीको गरिमा अन्तर्राष्ट्रिय स्तरमा उँचो राख्न, पुरातत्व जोगाउन र अलपत्र परेका गुरुयोजनाका काम समयमै सम्पन्न गर्न रोस्टरका आधारमा ख्यातिप्राप्त विज्ञहरूको आवश्यकता रहेको उनको भनाइ थियो।
प्रवक्ता राम विकास चौधरीले नागरिकता ऐन, २०६३ को दफा २१ अनुसार झुठा विवरण दिएर नागरिकता लिने विदेशी नागरिकलाई एकदेखि पाँच वर्षसम्म कैद र ५० हजारदेखि एक लाख रुपैयाँसम्म जरिवाना हुने तथा नागरिकता स्वतः रद्द हुने व्यवस्था रहेको स्मरण गराए। सरकारले नियुक्ति तत्काल बदर नगरे तिहारपछि आन्दोलन चर्किने उनले चेतावनी दिए।
भ्रष्टाचारविरोधी अभियन्ता सञ्जय कुमार मिश्रले पुराना दलहरूबाट ठगिएका जनताले सुशासनको आशा राखेको भए पनि सरकारले लुम्बिनी जस्तो संवेदनशील ठाउँ विदेशीलाई सुम्पेको टिप्पणी गरे। सरकारले समयमै कदम नसच्याए लुम्बिनीबाट मात्र नभई देशैभरिबाट विद्रोह हुने उनले चेतावनी दिए।
