सुर्खेत — कर्णाली प्रदेशका मुख्यमन्त्री मंगलबहादुर शाहीले प्रदेशका कमजोर सामाजिक सूचकांक सुधार्न केन्द्र सरकारले विशेष ध्यान दिनुपर्ने बताएका छन्। शुक्रबार मुख्यमन्त्री कार्यालयमा संघीय महिला, बालबालिका तथा ज्येष्ठ नागरिकमन्त्री सीता बादीसँग भएको भेटमा उनले बालमृत्युदर, कुपोषण, पुड्कोपना र बालविवाहजस्ता सूचकमा देखिएको पछौटेपन हटाउन केन्द्रबाट विशेष कार्यक्रम र पर्याप्त बजेट आउनुपर्ने माग गरे।
“हाम्रा सूचक निकै कमजोर छन्,” भेटमा शाहीले भने, “यसलाई सुधार गर्न संघीय सरकारले थप कार्यक्रम, बजेट र प्रभावकारी सहकार्य गर्नुपर्छ।” मन्त्री बादी स्वयं कर्णालीकै प्रतिनिधित्व गर्ने भएकाले यस विषयमा उनले विशेष चासो लिइदिन आग्रह गरे।
मुख्यमन्त्री शाहीले पछिल्ला वर्षहरूमा किशोर–किशोरीको मानसिक स्वास्थ्य ठूलो चुनौतीका रूपमा देखा परेको भन्दै त्यसमा पनि विशेष ध्यान दिनुपर्ने बताए। उनले संघ र प्रदेशबीचको सहकार्य बलियो भएमा मात्र यस्ता समस्या समाधान हुने धारणा राखे।
जवाफमा मन्त्री बादीले कर्णालीको समग्र सुधारका लागि प्रदेश सरकारसँग सहकार्य गर्न आफूहरू पूर्ण रूपमा तयार रहेको बताइन्। कर्णालीमा बालसुधार गृह स्थापनाका लागि आवश्यक पहल भइरहेको जानकारी पनि उनले दिइन्। भेटमा दुवै पक्षले आगामी दिनमा नियमित सम्पर्क र सहकार्य अघि बढाउने सहमति जनाए।
