जनकपुरधाम — मिथिलाको धार्मिक नगरी जनकपुरधाम र भारतको अयोध्याबीच सीधा रेल सेवा सञ्चालन गर्ने तयारीले गति लिएको छ। प्रस्तावित सेवाअघि बिहीबार १७ वटा बोगीसहितको भारतीय रेल जयनगरबाट जनकपुरको कुर्थासम्म ल्याएर परीक्षण गरिएको छ। अयोध्याबाट भारतीय रेल्वेका पदाधिकारीसहित डब्ल्यूडीपी–४ डी ४०३७० नम्बरको इन्जिनले तानेको रेल जनकपुरसम्म आइपुगेको नेपाल रेल्वेका प्रमुख परिवेश पराजुलीले जानकारी दिए।
पराजुलीका अनुसार जनकपुरधामलाई माता सीताको जन्मभूमि र अयोध्यालाई भगवान् रामको जन्मभूमिका रूपमा धार्मिक मान्यता दिइन्छ। दुई सहरबीच सीधा रेल सम्पर्क स्थापित भए रामायणसँग जोडिएका धार्मिक स्थलको भ्रमण गर्न चाहने श्रद्धालु र पर्यटकलाई सहज हुने उनको भनाइ छ। यसले रामायण सर्किटको अवधारणालाई व्यवहारमा जोड्नसमेत सहयोग पुग्ने अपेक्षा गरिएको छ।
प्रारम्भिक छलफलअनुसार सातामा एक दिन जनकपुरधामबाट अयोध्यासम्म रेल सञ्चालन गर्ने र अर्को दिन फर्काउने योजना बनाइएको छ। नेपालतर्फ जनकपुरधाम र जयनगरमा स्टेसन रहनेछन् भने भारततर्फका स्टेसन र रुट अझै टुङ्गो लाग्न सकेको छैन। सेवा सञ्चालनको मिति, भाडादर र व्यवस्थापनका विषयमा नेपाल र भारतबीच औपचारिक सम्झौता हुन बाँकी छ।
दुई सहरबीचको प्रस्तावित रेलमार्गको दूरी करिब ४६४ किलोमिटर छ। सम्झौतापछि सेवाको औपचारिक उद्घाटन नेपालका प्रधानमन्त्री बालेन शाह र भारतका प्रधानमन्त्री नरेन्द्र मोदीले संयुक्त रूपमा गर्ने विषयमा छलफल भइरहेको छ। यद्यपि, यसबारे दुवै देशबीच औपचारिक बैठक र निर्णय हुन बाँकी छ।
यसैबीच, रेल सेवा सञ्चालनका लागि जनकपुरधाम रेल्वे स्टेसनको प्लेटफर्म स्तरोन्नति गर्ने काम भइरहेको छ। उद्योग वाणिज्य संघ जनकपुरका अध्यक्ष सुरेन्द्र भण्डारीले रेल सेवा सञ्चालन हुँदैमा पर्यटकको बसाइ र खर्च बढ्ने सुनिश्चित नहुने बताए। उनका अनुसार जानकी मन्दिरबाहेक रामायणसँग सम्बन्धित अन्य धार्मिक तथा सांस्कृतिक स्थलको पहिचान, प्रचारप्रसार, स्तरीय होटल तथा यातायात सेवा र व्यवस्थित पर्यटन प्याकेज बनाउन पहलकदमी गर्नुपर्छ।
