ठमेल पर्यटन विकास परिषद्ले भोटेकोशी बाढीबाट प्रभावित क्षेत्रको पुनर्निर्माण तथा पुनःस्थापनाका लागि प्रधानमन्त्री राहत कोषमा १६ लाख ४० हजार २१८ रुपैयाँ सहयोग गरेको छ। परिषद्ले शुक्रबार साँझ काठमाडौँका प्रमुख जिल्ला अधिकारीमार्फत उक्त रकम हस्तान्तरण गरेको हो।
गत भदौ १० गते रसुवाको भोटेकोशीमा आएको बाढीले ठूलो जनधन तथा भौतिक क्षति पुर्याएको थियो। बाढीबाट भत्किएका संरचनाको पुनर्निर्माण र प्रभावित नागरिकको पुनःस्थापनामा सघाउन परिषद्ले राहत कोषमा रकम जम्मा गरेको जनाएको छ।
ठमेलमा शुक्रबार साँझ आयोजित ‘ठमेल क्षेत्रको शान्ति सुरक्षासम्बन्धी छलफल तथा अन्तरक्रिया’ कार्यक्रममा परिषद्का अध्यक्ष राजुमान डङ्गोलले काठमाडौँका प्रमुख जिल्ला अधिकारी ईश्वरीराज पौडेललाई उक्त रकम बराबरको चेक हस्तान्तरण गरेका थिए।
कार्यक्रममा प्रमुख जिल्ला अधिकारी पौडेलले विपद्को कठिन घडीमा ठमेल क्षेत्रका घरधनी तथा व्यवसायीले पीडितका लागि देखाएको सहयोगको उच्च प्रशंसा गरे। परिषद्का कोषाध्यक्ष किन्चु ल्हामु भुटिया श्रेष्ठले प्राकृतिक विपद्बाट प्रभावित क्षेत्रको पुनर्निर्माण, भौतिक संरचनाको पुनःस्थापना तथा प्रभावित नागरिकलाई राहत पुर्याउने उद्देश्यले सहयोग गरिएको जानकारी दिइन्।
परिषद्ले यसअघि नै रसुवामा पुगेर २५ लाख रुपैयाँ बराबरको खाद्यान्न, भाडाकुँडा र लत्ताकपडा वितरण गरिसकेको महासचिव पशुपति कँडेलले जानकारी दिए। परिषद्ले विपद् प्रभावित क्षेत्रको पुनर्निर्माणमा सरकार, निजी क्षेत्र तथा विभिन्न सङ्घसंस्थाबीच सहकार्य र एकताबद्ध प्रयास आवश्यक रहेको जनाएको छ।
