काठमाडौं — नेपाली कांग्रेसकी महामन्त्री डिला संग्रौला पन्तले दुई तिहाइ बहुमतको आडमा वर्तमान सरकारले प्रश्न उठाउनेहरूलाई तर्साउने र पेल्ने काम गरिरहेको आरोप लगाएकी छन्। शनिबार काठमाडौंमा आयोजित कार्यक्रममा बोल्दै उनले सरकार सत्ता कब्जा गर्ने र लोकतन्त्र खोस्ने दिशामा अघि बढिरहेको दाबी गरिन्। यस्तो प्रवृत्तिविरुद्ध कांग्रेस सडक आन्दोलनमा जान पनि पछि नपर्ने उनको चेतावनी थियो।
नेपाल विद्यार्थी संघ गोरखा–काठमाडौं सम्पर्क समितिले आयोजना गरेको दीपावली, नेपाल संवत् ११४७ तथा छठ पर्वको शुभकामना आदानप्रदान कार्यक्रममा प्रमुख अतिथिका रूपमा बोल्दै महामन्त्री पन्तले मुलुक कठिन मोडबाट गुज्रिरहेको बताइन्। देशका गम्भीर समस्या थाती राखेर लोकतन्त्रका लागि संघर्ष गरेका नेता र दलविरुद्ध राज्यशक्ति प्रयोग हुनु आपत्तिजनक भएको उनको भनाइ थियो।
शिक्षाको स्तर खस्किँदै गएको र युवाहरूको गन्तव्य विदेश बन्दै गएकोप्रति उनले चिन्ता व्यक्त गरिन्। सरकारले युवालाई स्वदेशमै भविष्य देखाउन नसकेको आरोप लगाउँदै उनले कांग्रेसले युवालाई विदेश पठाउने होइन, स्वदेश फर्काउने अभियान चलाउने बताइन्।
कार्यक्रममा राष्ट्रिय सभा सदस्य किरणबाबु श्रेष्ठले कांग्रेसको १५औँ महाधिवेशनले पार्टीमा नयाँ उत्साह थपेको बताए। बूढीगण्डकीको बाढीबाट घरबारविहीन भएकाहरूले अझै छानो र पाल नपाएको भन्दै उनले प्रभावितलाई तत्काल राहत दिन माग गरे।
नेविसंघ केन्द्रीय अध्यक्ष करुणा कटुवालले सभापतिमात्र होइन, लाखौँ क्रियाशील सदस्यको समेत छानबिन गर्न सरकारलाई चुनौती दिइन्। लोकतन्त्रमाथि खतरा उत्पन्न भए नेविसंघ चुप लागेर नबस्ने उनको भनाइ थियो। कांग्रेस केन्द्रीय सदस्य जानुका पन्तले आवश्यक परे भ्रातृ संगठन सडकमा उत्रिने बताइन् भने इन्जिनियर दीपकबाबु कँडेलले महँगी र बेरोजगारी बढ्दै गए पनि सरकारले ध्यान नदिएको बताए।
