परासी — ज्यान मुद्दामा अदालतले तोकेको कैद सजाय भुक्तान नगरी दुई दशकदेखि भागिरहेका एक व्यक्तिलाई प्रहरीले उनकै घरबाट पक्राउ गरेको छ। पक्राउ पर्ने व्यक्ति नवलपरासी (बर्दघाट सुस्ता पश्चिम) को प्रतापपुर गाउँपालिका–७ सूर्यपुराका ५७ वर्षीय वीरेन्द्र गुप्ता हुन्।
नवलपरासी जिल्ला अदालतले २०६३ असार ३२ गते गुप्तालाई ज्यान मुद्दामा १० वर्ष ५ महिना १७ दिन कैदको फैसला सुनाएको थियो। तर फैसलापछि उनी सजाय भोग्न नगई फरार भएका थिए। लामो समयदेखि खोजीमा रहेका उनलाई इलाका प्रहरी कार्यालय बेलाटारीबाट खटिएको प्रहरी टोलीले घरमै पुगेर नियन्त्रणमा लिएको हो।
पक्राउपछि गुप्तालाई फैसला कार्यान्वयनका लागि नवलपरासी जिल्ला अदालतमा उपस्थित गराइएको थियो। अदालतको आदेशअनुसार उनलाई कारागार पठाइएको जिल्ला प्रहरी कार्यालय परासीका सूचना अधिकारी प्रहरी नायब उपरीक्षक मदन थापाले जानकारी दिए।
फैसला सुनाइएको दुई दशकपछि दोषी पक्राउ पर्नुले लामो समयदेखि फरार रहेका कसुरदारहरूको खोजीमा प्रहरी सक्रिय रहेको देखिएको छ।
