काठमाडौं — सरकारले साइबर सुरक्षाका लागि छुट्टै डाटा सुरक्षा बोर्ड स्थापना गर्ने तयारी अघि बढाएको छ। प्रधानमन्त्री कार्यालयअन्तर्गतको सूचना प्रविधि तथा डिजिटल गभर्नेन्स कार्यालयका सहसचिव सुवास ढकालले आगामी छ महिनाभित्र त्यससम्बन्धी विधेयक मन्त्रिपरिषद्बाट पारित गरेर संसदमा पेस गर्ने तयारी भइरहेको जानकारी दिए।
शनिबार राजधानीको होटल हिमालयमा डिजिटल मिडिया फाउण्डेशनले आयोजना गरेको ‘नेसनल एआई समिट २०२६’ मा बोल्दै ढकालले विधेयकको मस्यौदा तयार भइरहेको बताए। डाटा सुरक्षाबारे संविधानमै स्पष्ट व्यवस्था भएकाले बोर्ड स्थापना गर्न लागिएको उनको भनाइ थियो। उनले सरकारी निकायको मात्र नभई निजी क्षेत्र र नागरिकको डाटा सुरक्षाका लागि पनि बोर्ड आवश्यक रहेको स्पष्ट पारे।
सरकारी निकायमा कृत्रिम बुद्धिमत्ता प्रयोग गरेर सेवा प्रवाह कसरी प्रभावकारी बनाउने भन्ने विषयमा सरकार गम्भीर गृहकार्यमा रहेको ढकालले बताए। विश्वभर एआईसँग सम्बन्धित सेवामा प्रतिस्पर्धा गर्ने बाटोबारे एआई नीतिमार्फत नै स्पष्ट गरिएको उनको दाबी थियो। नेपालमा स्वच्छ ऊर्जाको प्रचुरता र हिमालय भएकाले एआई डाटा सेन्टरको सम्भावना रहेको उनले औँल्याए। डाटा सुरक्षा र साइबर सुरक्षा अब सरकारको मात्र नभई नागरिकको समेत जिम्मेवारीको विषय भएको उनले बताए।
