सर्लाहीको भारतसँग जोडिएको सीमा क्षेत्रमा सशस्त्र प्रहरीले मोटरसाइकलको पेट्रोल ट्याङ्कीभित्र लुकाएर ल्याइएको ठूलो परिमाणको प्रतिबन्धित औषधि बरामद गरेको छ। शुक्रबार दिउँसो भएको कारबाहीमा १०० एमएलका १२९ बोतल कोरेक्स फेला परेको हो।
सशस्त्र प्रहरी बल नेपाल, बीओपी त्रिभुवननगरबाट खटिएको चार सदस्यीय मोटरसाइकल गस्ती टोलीले ब्रह्मपुरी गाउँपालिका–४ स्थित त्रिभुवननगरमा सहायक सीमा स्तम्भ नम्बर ३२४/३ नजिकको दशगजा क्षेत्रमा उक्त औषधि बरामद गरेको हो। टोलीको नेतृत्व सशस्त्र प्रहरी नायब निरीक्षक बलदेव राज पाण्डेले गरेका थिए।
गस्तीका क्रममा भारतबाट नेपालतर्फ आउँदै गरेको बीआर ०१ एफभी ३३३१ नम्बरको मोटरसाइकललाई रोक्ने प्रयास गरिएको थियो। प्रहरी देख्नेबित्तिकै चालकले मोटरसाइकल खोला किनारमा छाडेर भारततर्फ भागेका थिए। त्यसपछि मोटरसाइकल नियन्त्रणमा लिएर जाँच गर्दा पेट्रोल ट्याङ्कीभित्र लुकाएर राखिएका १२९ बोतल कोरेक्स भेटिएको सशस्त्र प्रहरीले जनाएको छ।
बरामद मोटरसाइकल र लागुऔषध आवश्यक कानुनी कारबाहीका लागि नेपाल प्रहरीलाई बुझाउने तयारी भइरहेको सशस्त्र प्रहरी उपरीक्षक अमरबहादुर खत्रीले जानकारी दिए।
सीमा क्षेत्रमा अवैध सामग्रीको ओसारपसार रोक्न सशस्त्र प्रहरीले नियमित गस्ती गरिरहेको छ। यसपटक पेट्रोल ट्याङ्कीभित्र लुकाएर ल्याइएको औषधि गस्ती टोलीको जाँचमा फेला परेको हो। फरार चालकको पहिचान र खोजीको काम पनि अघि बढाइएको छ।
