काठमाडौं । नेपाली कांग्रेसका नेता डा. शशांक कोइरालाले सभापति गगन थापामाथि आक्रमण गर्दा त्यसले उनको महत्त्व झन् बढाउने बताएका छन्।
देउवा समूहले शनिबार राष्ट्रिय सभागृहमा आयोजना गरेको काठमाडौं जिल्ला अधिवेशनको उद्घाटनमा बोल्दै कोइरालाले थापाको चर्चा नै नगर्न आग्रह गरे। जति गाली गर्यो, त्यति उनको महत्त्व बढ्ने उनको तर्क थियो।
फिल्मको दृश्य सम्झाउँदै कोइरालाले नायकले भिलेनसँग लड्दा भिलेनकै चर्चा हुने बताए। देउवा पक्षका नेता–कार्यकर्ताले थापालाई भिलेन ठानेको भए पनि असली भिलेन अरू नै भएको उनले बताए।
उनका अनुसार मुलुकको असली समस्या गरिबी, अशिक्षा र बेरोजगारी हो। यिनै समस्याविरुद्ध लड्नुपर्ने उनको भनाइ थियो।
आसन्न १५औं महाधिवेशन अत्यन्त महत्त्वपूर्ण भएको भन्दै कोइरालाले त्यसलाई गम्भीरतापूर्वक लिन आग्रह गरे। जिल्ला अधिवेशनमा देखिएको उपस्थितिले कार्यक्रम सफल भएको आफूले मानेको उनले बताए।
