पोल्यान्डको ऐतिहासिक सहर क्राकोभको मुख्य बजार चोकमा शनिबार दिउँसो भएको गोलीकाण्डमा कम्तीमा पाँच जनाको ज्यान गएको छ भने करिब एक दर्जन मानिस घाइते भएका छन्।
स्थानीय प्रहरीका अनुसार स्थानीय समयअनुसार दिउँसो करिब ३ बजे एक व्यक्तिले आफ्नो कार चोकभित्र पसाएर कारभित्रैबाट सर्वसाधारणमाथि अन्धाधुन्ध गोली चलाएका थिए। बजारमा किनमेल र घुमघामका लागि पुगेका मानिसहरू एक्कासि गोलीको आवाज सुनेर भागाभाग भएका थिए।
घटनापछि तत्कालै पुगेको प्रहरी टोलीले जवाफी कारबाही गर्दा सन्दिग्ध आक्रमणकारी पनि गोली लागेर घाइते भएका छन्। उनलाई प्रहरीले नियन्त्रणमा लिएर उपचारका लागि अस्पताल लगिएको छ। घाइतेहरूको अवस्था र घटनाको कारणबारे अनुसन्धान भइरहेको प्रहरीले जनाएको छ।
यसैबीच पोल्यान्डका प्रधानमन्त्री डोनाल्ड टस्कले सामाजिक सञ्जालमार्फत घटनाप्रति दुःख व्यक्त गरेका छन्। उनले घटनाक्रमबारे आफू निरन्तर जानकारी लिइरहेको बताएका छन्।
क्राकोभ युरोपका सबैभन्दा पुराना र पर्यटकले भरिने सहरमध्ये एक हो। मुख्य बजार चोकमा भएको यस घटनाले सहरवासीसँगै पर्यटकहरूमा पनि त्रास फैलिएको छ।
