झापाको भद्रपुरबाट भन्सार छलेर ल्याइएका साढे २५ लाख रुपैयाँभन्दा बढी मूल्यका भारतीय फूल सशस्त्र प्रहरीले नियन्त्रणमा लिएर नष्ट गरेको छ।
सशस्त्र प्रहरी बल नेपाल नं. २ गण, झापाबाट खटिएको मोबाइल गस्ती टोलीले आइतबार दिउँसो करिब १२ बजे भद्रपुर नगरपालिका–८ को देवीबस्ती क्षेत्रबाट ती फूल बरामद गरेको हो। विशेष सूचनाका आधारमा सशस्त्र प्रहरी नायब निरीक्षक अमरबहादुर भुजेलको कमान्डमा नौ जनाको टोली परिचालन गरिएको थियो।
बरामद सामग्रीमा ११ हजार ३ सय ४२ थान भारतीय सयपत्री फूलका माला रहेका छन्, जसको मूल्य २२ लाख ६८ हजार ४ सय रुपैयाँ आँकिएको छ। त्यसैगरी १२ झोला भारतीय कमलको फूल पनि फेला परेको छ, जसको मूल्य २ लाख ९५ हजार रुपैयाँ रहेको प्रहरीले जनाएको छ।
कुल २५ लाख ६३ हजार ४ सय रुपैयाँ बराबरका ती फूल स्थानीय प्रतिनिधिहरूको उपस्थितिमा सशस्त्र प्रहरी बल नेपाल नं. २ गण झापाको कार्यालय परिसरभित्र खाल्डो खनेर नष्ट गरिएको हो।
चाडपर्वको समयमा अवैध रूपमा भित्र्याइने फूल तथा अन्य सामग्री नियन्त्रण गर्न सीमा क्षेत्रमा गस्ती बढाइएको सशस्त्र प्रहरीले जनाएको छ।
