काठमाडौंको बालुवाटारस्थित नेपाल हाउस रेस्टुरेन्टमा जुवातास खेलिरहेको अवस्थामा ९ जनालाई प्रहरीले नियन्त्रणमा लिएको छ। प्रहरीले उनीहरूको साथबाट ६ लाख ६५ हजार १ सय ९५ रुपैयाँ नगद र तास बरामद गरेको छ।
जिल्ला प्रहरी परिसर काठमाडौं, भद्रकालीका अनुसार २०८३ साल माघ २२ गते राति करिब २ बजे उक्त रेस्टुरेन्टमा जुवातास खेलिरहेको भन्ने विशेष सूचना प्रहरीले पाएको थियो। सूचनाका आधारमा प्रहरी वृत्त मालीगाउँबाट खटिएको टोलीले रेस्टुरेन्टमा छापा मारेर उनीहरूलाई पक्राउ गरेको हो।
छापा मार्ने क्रममा जुवाखालबाट ९ बुक तास, ६ लाख ६५ हजार १ सय ९५ रुपैयाँ नगद र १० थान मोबाइल फेला परेको प्रहरीले जनाएको छ।
पक्राउ पर्नेहरूमा सुनिल श्रेष्ठ, सहिद महम्मद, सरोज कार्की, सोनाम शेर्पा, अनिल लामिछाने, गणेश मान श्रेष्ठ, अनिल भण्डारी, ताराविर तामाङ र महेन्द्र खनाल रहेका छन्। उनीहरूमाथि थप अनुसन्धान भइरहेको प्रहरीले जनाएको छ।
