अछाम र डोटी जिल्लाको सिमानामा पर्ने गण्डीगाडमा निर्माण हुन लागेको मोटरेवल पुल सम्झौता भएको १६ महिना बितिसक्दा पनि अधुरै छ। पुल नबन्दा स्थानीय बासिन्दा जीर्ण झोलुङ्गे पुलबाट दैनिक जोखिमपूर्ण यात्रा गर्न बाध्य छन्।
पूर्वाधार विकास कार्यालय साँफेबगरले अछामको चौरपाटी गाउँपालिका–२ र दिपायल सिलगढी नगरपालिका–८ जोड्ने गण्डीगाडमा ४० मिटर लामो पुल निर्माण गर्न एस एस एन एस पि सि एस–ए सि जेभी धनगढी–५ कैलालीसँग सम्झौता गरेको थियो। पुल निर्माणका लागि पाँच करोड २१ लाख रुपैयाँमा २०८२ असार २२ गते सम्झौता भएको थियो।
निर्माणस्थलमा डोजरले बाटो बनाउने क्रममा माथिबाट ठूलो ढुङ्गा खस्दा गण्डीगाडमा रहेको झोलुङ्गे पुलमा समेत क्षति पुगेको थियो। क्षतिग्रस्त पुल भएर अहिले दैनिक जसो नागरिक आवतजावत गरिरहेका छन्।
पटकपटक ताकेता गर्दा पनि पूर्वाधार विकास कार्यालयले कुनै चासो नदिएको चौरपाटी गाउँपालिकाका अध्यक्ष भीमबहादुर साउदले बताए। पुल नबन्दा बिरामीलाई उपचारका लागि लैजान समस्या भएको स्थानीय ध्रुव साउदले बताए। अछामबाट डोटीको दिपायल र सिलगढीमा अध्ययन गर्न जाने विद्यार्थी पनि यही पुल भएर जोखिम मोल्दै जाने गरेका छन्।
कार्यालयले निर्माणमा संलग्न कम्पनीलाई काम अगाडि बढाउन पत्राचार गरिसकेको पूर्वाधार विकास कार्यालय साँफेबगर अछामका सूचना अधिकारी देवीप्रसाद उपाध्यायले जानकारी दिए।
