स्पेनिस ला लिगामा बार्सिलोनाले एट्लेटिको म्याड्रिडको मैदानमा २–१ को रोमाञ्चक पुनरागमन जित हात पारेको छ। घरेलु टोलीले सुरुवाती अग्रता लिएको खेलमा पाहुना टोलीले दोस्रो हाफमा खेल उल्टाएर तीन अंक आफ्नो पक्षमा पार्यो।
खेलको १०औँ मिनेटमा जुलियानो सिमिओनीले गोल गर्दै एट्लेटिकोलाई अगाडि बढाएका थिए। तर, पहिलो हाफको अन्त्यतिर फर्मीन लोपेजले गोल गर्दै बार्सिलोनालाई १–१ को बराबरीमा ल्याए।
दोस्रो हाफको ६६औँ मिनेटमा लोपेजले व्यक्तिगत दोस्रो गोल गर्दै बार्सिलोनाको जित पक्का गरे। उनको उक्त गोल नै निर्णायक बन्यो। बाँकी समयमा एट्लेटिको खेलमा फर्किन सकेन।
यो जितसँगै बार्सिलोनाले अंक तालिकाको शीर्ष स्थानमा आफ्नो पकड कायमै राखेको छ। पराजय व्यहोरेको एट्लेटिको म्याड्रिड भने तालिकाको तेस्रो स्थानमा झरेको छ।
