रसुवाको स्याफ्रुबेँसीमा भोटेकोशीको बाढीले बगाएको काठेपुल तीन दिनको लगातार मेहनतपछि फेरि बनेर सञ्चालनमा आएको छ । पुल तयार भएसँगै उक्त क्षेत्रका मानिसहरूको पैदल हिँडडुल पहिलेजस्तै सहज भएको छ ।
कात्तिक १४ गते आएको बाढीले स्याफ्रुबेँसी खोलामाथिको पुल बगाएको थियो । गोसाइँकुण्ड गाउँपालिका–५ मा पर्ने यो पुल स्थानीय तह, सुरक्षा निकाय र नागरिक समाज मिलेर पुनः निर्माण गरेका हुन् ।
पुल बनाउने काममा नेपाल रेडक्रस सोसाइटी, गोसाइँकुण्ड र आमाछोदिङ्मो गाउँपालिकाका वडा प्रतिनिधि र कर्मचारी, नेपाल प्रहरी, सशस्त्र प्रहरी बल तथा स्थानीय बासिन्दाले श्रमदान गरेर सक्रिय भूमिका खेलेका थिए ।
भदौ १० गतेको विनाशकारी बाढीले स्याफ्रुबेँसीको पक्की पुल र सडकखण्ड बगाएपछि रसुवाको उत्तरी भेगमा यातायात सेवा पूरै बन्द भएको थियो । यातायात र पैदल बाटो दुवै अवरुद्ध भएपछि गोसाइँकुण्ड गाउँपालिका (वडा नं १ देखि ५) र आमाछोदिङ्मो गाउँपालिका (वडा नं १ देखि ५) का सर्वसाधारणले लामो समयसम्म निकै कठिनाइ भोग्नुपरेको थियो ।
सडक सञ्जाल टुटेपछि अस्थायी रूपमा बनाइएको काठेपुल पनि कात्तिक १४ गते नदीको बहाव बढ्दा बगेको थियो । अहिले सबैको संयुक्त प्रयासमा काठेपुल पुनः खडा भएपछि दुवै गाउँपालिकाका बासिन्दा र त्यहाँबाट यात्रा गर्ने यात्रुहरूलाई पैदल हिँड्न निकै सजिलो भएको आमाछोदिङ्मो गाउँपालिका वडा नं ५ का वडाध्यक्ष गोम्बोछिरिङ तामाङ (रामबहादुर) ले जानकारी दिए ।
