इज्मिर । टर्कीको पश्चिमी प्रान्त इज्मिरको आलियागास्थित हाबास स्टिल कारखानामा सोमबार भएको विस्फोटपछि लागेको आगलागीमा परी तीन जनाको मृत्यु भएको छ भने १० जना बेपत्ता भएका छन्।
विस्फोटमा १४ जना कामदार घाइते भएका छन्। घाइतेमध्ये तीन जनाको अवस्था गम्भीर रहेको प्रान्तीय गभर्नरको कार्यालयले जनाएको छ।
कारखानाको भग्नावशेषमा फसेका १० जनाको खोजी तथा उद्धार कार्य जारी रहेको अधिकारीहरूले बताएका छन्। आन्तरिक मामिलामन्त्री मुस्तफा सिफ्टचीका अनुसार उद्धार टोलीले आगो नियन्त्रणमा लिँदै प्रभावित कामदारको खोजी गरिरहेको छ।
प्रान्तीय गभर्नरको कार्यालयका अनुसार तरल स्टिल ढाल्ने क्रममा माथि रहेको क्रेन भट्टीभित्र खसेपछि विस्फोट भएको प्रारम्भिक जानकारी प्राप्त भएको छ। घटनाबारे अनुसन्धान सुरु गरिएको छ।
सरकारी समाचार संस्था आनादोलुका अनुसार विस्फोट यति शक्तिशाली थियो कि आसपासको जमिनसमेत हल्लिएको प्रत्यक्षदर्शीले बताएका छन्।
सन् १९८७ मा स्थापना भएको हाबास कारखानाको वार्षिक स्टिल उत्पादन क्षमता ४५ लाख टन रहेको कम्पनीको वेबसाइटमा उल्लेख छ। आलियागा क्षेत्र ठूलो बन्दरगाह र जहाज भत्काउने उद्योगका लागि समेत परिचित छ।
