लन्डन । बेलायती हास्य कलाकार तथा अभिनेता रसेल ब्रान्डलाई बलात्कार र यौन दुर्व्यवहारका मुद्दामा साढे १० वर्षको जेल सजाय सुनाइएको छ । लन्डनस्थित साउथवार्क क्राउन अदालतले सोमबार ५१ वर्षीय ब्रान्डको सजाय निर्धारण गरेको हो ।
सजायपछि ब्रान्डलाई जेलतर्फ लैजान लाग्दा उनले दर्शकदीर्घामा रहेकी श्रीमती लौरा ब्रान्डतर्फ हेरे र केही क्षण रोकिएर ‘आई लभ यू’ भनेका थिए ।
अदालतले गत बिहीबार ब्रान्डलाई यौन अपराधमा दोषी ठहर गरेको थियो । सन् २००४ देखि २००९ को अवधिमा चार महिलामाथि भएका यौन अपराधमा उनी दोषी पाइएका हुन् । तीमध्ये एक बलात्कार र तीन यौन दुर्व्यवहारका घटना छन् ।
फैसला सुनाउने क्रममा न्यायाधीशले ब्रान्डलाई ‘यौन सिकारी’ को संज्ञा दिए । उनीमा असाधारण अहंकार रहेको र अदालतसमक्ष झुटको शृङ्खला प्रस्तुत गरेको न्यायाधीशको टिप्पणी थियो । सन् २०२३ मा सञ्चारमाध्यमले उनीमाथिका आरोप सार्वजनिक नगरेसम्म उनको ख्यातिले उनलाई जोगाइरहेको पनि न्यायाधीशले उल्लेख गरे ।
सुनुवाइका क्रममा पीडित महिलाहरूले आफूले भोगेको मानसिक आघातबारे अदालतमा बयान दिएका थिए । सन् २००९ मा ब्रान्डको घरमा बलात्कृत भएकी एक महिलाले त्यसपछि आफूलाई एचआईभी संक्रमण हुने डरले लामो समय सताएको बताइन् । अर्की पीडितले टेलिभिजनमा ब्रान्डलाई देख्दासमेत आफूलाई शारीरिक रूपमा असहज हुने बताइन् ।
ब्रान्डका वकिलले उनी अहिले पूर्ण रूपमा परिवर्तन भइसकेको दाबी गर्दै सजायमा सहुलियत दिन आग्रह गरेका थिए । लागुऔषध दुर्व्यसनमा परेकाहरूको पुनःस्थापना र समाजसेवामा उनले गरेको योगदानलाई ध्यान दिनुपर्ने वकिलको तर्क थियो । घटना १७ वर्ष पुरानो भएको र सजायले उनका १० वर्षीय छोरासहित परिवारलाई असर पार्ने जिकिर पनि गरिएको थियो । तर सरकारी वकिलले अपराध गम्भीर प्रकृतिका रहेको भन्दै कडा सजायको माग गरेका थिए ।
