काठमाडौँ उपत्यका ट्राफिक प्रहरी कार्यालयका प्रमुख प्रहरी वरिष्ठ उपरीक्षक सुरेशप्रसाद काफ्लेले तिहार र छठ पर्वका बेला उपत्यकाको ट्राफिक व्यवस्थापनलाई अझ चुस्त बनाउन मातहतका कर्मचारीलाई कडा निर्देशन दिएका छन्।
सोमबार कार्यालयमा आयोजित तिहार तथा छठ लक्षित शुभकामना आदानप्रदान कार्यक्रममा बोल्दै उनले पर्वका समयमा ट्राफिक व्यवस्थापनमा कुनै कमीकमजोरी हुन नदिन उच्च सतर्कताका साथ आफ्नो जिम्मेवारी निर्वाह गर्न आग्रह गरे।
नागरिकले हर्षोल्लासका साथ चाडपर्व मनाउन पाउनु नै प्रहरीको मुख्य खुसी भएको उल्लेख गर्दै एसएसपी काफ्लेले सबैलाई सहज र सुरक्षित आवागमनको वातावरण सुनिश्चित हुने गरी आआफ्नो ड्युटीमा खटिन निर्देशन दिए।
चाडपर्वका बेला सवारी दुर्घटनाका घटना बढ्ने उच्च सम्भावना रहने भएकाले दुर्घटना न्यूनीकरणलाई पहिलो प्राथमिकतामा राखेर सक्रिय रूपमा ट्राफिक व्यवस्थापन गर्न उनले मातहतका निकायलाई कडा निर्देशन दिएका छन्।
पर्वका समयमा सडकमा सवारी चाप बढ्ने र यात्रुको आवागमन पनि उल्लेख्य रूपमा बढ्ने भएकाले ट्राफिक प्रहरीले आफ्नो भूमिकालाई थप जिम्मेवारीपूर्वक निर्वाह गर्नुपर्नेमा उनले जोड दिए। नागरिकको सुरक्षा नै प्रहरीको पहिलो प्राथमिकता रहेको उल्लेख गर्दै उनले पर्व अवधिभर कुनै पनि लापरबाही नगर्न कर्मचारीलाई सचेत गराए।
कार्यक्रममा सञ्चारकर्मी, नागरिक समाजका प्रतिनिधि तथा काठमाडौँ उपत्यका ट्राफिक प्रहरी कार्यालय र मातहतका निकायका ट्राफिक प्रहरी अधिकृत एवं कर्मचारीहरूको सहभागिता रहेको थियो।
