कास्की । राष्ट्रिय गौरवको आयोजना पुष्पलाल (मध्यपहाडी) लोकमार्गको कास्की खण्डमा तीन वटा पक्की पुल निर्माण सम्पन्न भएर सञ्चालनमा आएका छन्। पुल बनेपछि यस खण्डको यातायात सहज भएको छ।
पोखरा महानगरपालिका–२५ स्थित याम्दी खोलामा सडकको चौडाइअनुसार दुई वटा नयाँ पुल बनेका छन्। यसअघि फराकिलो सडकमा साँघुरो पुल हुँदा विपरीत दिशाबाट आउने सवारीसाधन एकैपटक पार हुन सक्दैनथे र जाममा बस्नुपर्ने अवस्था थियो।
पोखराबाट सिदिङसम्म नियमित जीप चलाउँदै आएका चालक बुद्ध गुरुङका अनुसार पुल निर्माणपछि यात्रा सहज भएको छ। पहिले साँघुरो पुलका कारण अगाडिबाट गाडी आए रोकिएर पालो कुर्नुपर्थ्यो र कहिलेकाहीँ सवारीसाधनको लाम लाग्थ्यो। अहिले सडकको चौडाइअनुसारकै पुल बनेपछि गाडी रोकिरहनु पर्दैन र समय पनि बचत भएको उनले बताए।
पुष्पलाल (मध्यपहाडी) राजमार्ग योजना कार्यालय पर्वतका सूचना अधिकारी इन्जिनियर उज्ज्वल शर्माका अनुसार कास्की खण्डमा रु २१ करोड ५९ लाख ७८ हजार लागतमा तीन वटा पक्की मोटरेबल पुल निर्माण गरिएको हो। याम्दी खोलामा पुरानो पुलको दायाँ र बायाँतर्फ एक–एक वटा नयाँ पुल बनेका छन्। दुवै पुलको लम्बाइ ५२–५२ मिटर रहेको छ। अन्नपूर्ण गाउँपालिकामा पर्ने पानीविहाडमा बनेको पुलको लम्बाइ १२४ मिटर रहेको छ।
तीन वटै पुल एउटै ठेक्कामार्फत निर्माण गरिएको हो। विसं २०७९ साउन २२ गते स्याङ्जाको गीता कन्स्ट्रक्सनसँग ठेक्का सम्झौता भएको थियो। सम्झौताअनुसार निर्माण सम्पन्न गरी पुल सञ्चालनमा ल्याइएको कार्यालयले जनाएको छ।
कास्की खण्डमा तीन वटा पुल निर्माण सम्पन्न भएपछि पोखराबाट पर्वत, बागलुङ, म्याग्दी र मुस्ताङका साथै कास्कीको उत्तरी तथा पश्चिमी क्षेत्रमा हुने यातायात थप सहज भएको छ।
