ललितपुर — गृहमन्त्री सुधन गुरुङले आधुनिकता र पश्चिमी प्रभाव बढ्दै गएको बेला नेपालको आफ्नै संस्कार, संस्कृति र परम्परालाई जोगाउनुपर्ने बताएका छन्। नयाँ पुस्ताले पुर्खाबाट पाएको सम्पदालाई आफ्नो बनाएर भावी पुस्तासम्म पुर्याउनुपर्ने उनको भनाइ छ।
नेपाल संवत् ११४७ को अवसरमा सोमबार ललितपुरको पाटन दरबार क्षेत्रस्थित कात्तिक डबलीमा आयोजित कार्यक्रममा बोल्दै गृहमन्त्री गुरुङले ललितपुरको कला, संस्कृति, वास्तुकला र ऐतिहासिक सम्पदाले नेपालको पहिचान विश्वसामु स्थापित गर्न ठूलो भूमिका खेलेको उल्लेख गरे। पुर्खाले जोगाएर राखेका सम्पदा र परम्पराकै कारण विदेशी पर्यटकलाई नेपालको ऐतिहासिक वैभव देखाउन सम्भव भएको उनले बताए।
नेवार समुदायका जात्रा, पर्व र सामूहिक परम्पराले समाजमा एकता बलियो बनाएको उनको भनाइ थियो। बाल्यकालमा घरमा नेवारी भाषा बोलिने गरेको सम्झँदै उनले अहिले त्यो भाषा बोल्न बिर्सिए पनि आफ्नो सांस्कृतिक पहिचान र पारिवारिक संस्कारप्रति गर्व रहेको बताए।
सबै जातजाति र समुदायले आ–आफ्नो मौलिक कला, संस्कृति र परम्पराको संरक्षण गर्नुपर्नेमा जोड दिँदै उनले अग्रजले नयाँ पुस्तालाई संस्कार सिकाएजस्तै अहिलेको पुस्ताले पनि भावी पुस्तालाई सांस्कृतिक विरासत हस्तान्तरण गर्नुपर्ने बताए।
तिहार र दीपावलीका परम्परागत गतिविधि क्रमशः घट्दै गएकोप्रति चिन्ता व्यक्त गर्दै गृहमन्त्री गुरुङले सुरक्षा व्यवस्थाका कारण सांस्कृतिक अभ्यासमा बाधा पुग्न नहुने बताए। घरघरमा गएर देउसी–भैलो खेल्ने र सामूहिक रूपमा पर्व मनाउने परम्परालाई निरन्तरता दिनुपर्नेमा उनले जोड दिए।
सांस्कृतिक गतिविधि सञ्चालन गर्न सहज वातावरण बनाउनु सरकारको जिम्मेवारी भएको उल्लेख गर्दै उनले २४ सै घण्टा सांस्कृतिक गतिविधि सञ्चालन गर्न सकिने गरी निर्णय गरिएको जानकारी दिए। पाटनसँग आफ्नो सामाजिक यात्राको विशेष सम्बन्ध रहेको बताउँदै उनले ‘इनफ इज इनफ’ आन्दोलनका क्रममा यही स्थानमा अनशन बसेको स्मरण गरे। कार्यक्रममा उनले नेपाल संवत् ११४७ को शुभकामना व्यक्त गरे।
