बागलुङ — दुई वर्षभित्र कालोपत्र गर्ने लक्ष्यसहित सुरु गरिएको बागलुङको एउटा रणनैतिक सडक चार वर्ष बितिसक्दा पनि पूरा हुन सकेको छैन। हरिचौर–मल्म–पाण्डवखानी सडकखण्ड अझै कालोपत्र हुन बाँकी रहेको सडक डिभिजन कार्यालय बागलुङले जनाएको छ।
‘एक निर्वाचन क्षेत्र, एक रणनैतिक सडक’ कार्यक्रमअन्तर्गत पर्ने यो सडक समयमा नबन्दा स्थानीय बासिन्दाले दैनिक आवतजावतमा सास्ती भोग्नुपरेको छ। गल्कोट नगरपालिका–७ मल्मका वडाध्यक्ष राजबहादुर थापाका अनुसार स्थानीयले निरन्तर खबरदारी र गुनासो गरे पनि त्यसको सुनुवाइ भएको छैन।
यो सडक २०८१ साल भदौभित्र सम्पन्न गरिसक्नुपर्ने थियो। निर्माणको जिम्मा वल्डवाइड तथा लोपूर्ण जेभी निर्माण कम्पनीले लिएको थियो। समयमा काम नभएपछि असन्तुष्ट स्थानीयले गत कात्तिकमा निर्माण व्यवसायीविरुद्ध आन्दोलनसमेत गरेका थिए।
विसं २०७९ भदौमा यो सडकका लागि २५ करोड २० लाख रुपैयाँमा ठेक्का सम्झौता गरिएको थियो। तोकिएको म्याद नाघिसक्दा पनि काम पूरा नभएपछि नागरिकस्तरबाट विरोधका कार्यक्रम हुँदै आएका छन्।
