नेपाल प्रिमियर लिगको तेस्रो संस्करण लिग चरणको अन्तिम घुम्तीमा पुगेको छ। सात खेल बाँकी रहँदा प्लेअफमा पुग्ने चार टोलीको टुंगो अझै लागेको छैन। शीर्ष दुईमा रहेका काठमान्डु गोर्खाज र सुदूरपश्चिम रोयल्स भने अरूभन्दा एक कदम अगाडि छन्।
पाँच खेलबाट आठ अंक जोडेको काठमान्डु तालिकाको शिरमा छ। उसको नेट रन रेट प्लस १.१६८ रहेको छ। अब सुदूरपश्चिम र पोखराविरुद्ध खेल्न बाँकी रहेको काठमान्डुलाई प्लेअफ पक्का गर्न एउटा जित काफी छ। दुवै खेल जिते १२ अंक पुग्नेछ भने दुवै हारेमा आठ अंकमै अड्किनेछ, जहाँ नेट रन रेट निर्णायक बन्न सक्छ।
छ खेलबाट आठ अंकसहित दोस्रो स्थानमा रहेको सुदूरपश्चिमको अब काठमान्डुविरुद्ध एउटै खेल बाँकी छ। त्यो खेल जिते १० अंक पुग्नेछ र प्लेअफ निश्चित हुनेछ। हारेमा आठ अंकमा रोकिनेछ र विराटनगरजस्ता टोलीले दुवै खेल जितेर आठ अंक पुर्याएमा चुनौती बढ्नेछ। सुदूरपश्चिमको नेट रन रेट ०.०८२ छ।
सात अंकसहित तेस्रो स्थानमा रहेको लुम्बिनीले कर्णाली र विराटनगरसँग खेल्न बाँकी छ। दुवै जिते ११ अंक पुग्नेछ भने एउटा जितले पनि नौ अंक पुर्याएर प्लेअफ पक्का गर्नेछ। पाँच अंक जोडेको चितवनले भने जनकपुर र कर्णालीविरुद्ध दुवै खेल जित्नैपर्छ; दुवै जिते नौ अंक पुग्नेछ।
चार अंकमा रहेका जनकपुर, कर्णाली र विराटनगरका लागि बाँकी खेल जित्नु मात्र पर्याप्त छैन — अरू टोलीको नतिजा पनि आफ्नो पक्षमा आउनुपर्छ। दुई अंक मात्र जोडेको पोखराको सम्भावना गणितीय रूपमा बाँकी भए पनि निकै क्षीण छ।
बाँकी सात खेलमा विराटनगर–पोखरा, कर्णाली–लुम्बिनी, काठमान्डु–सुदूरपश्चिम, चितवन–जनकपुर, विराटनगर–लुम्बिनी, चितवन–कर्णाली र काठमान्डु–पोखरा भिडन्त हुनेछन्। काठमान्डु र सुदूरपश्चिमबीचको खेलपछि कम्तीमा एउटा टोलीको १० अंक पुग्ने निश्चित छ।
