काठमाडौं । विश्वभरका लाखौं वेबसाइट सञ्चालनमा प्रयोग हुने ओपन–सोर्स प्रोग्रामिङ भाषा पीएचपीमा दुईवटा गम्भीर सुरक्षा कमजोरी फेला परेपछि सरकारी तथा निजी वेबसाइटहरू उच्च जोखिममा परेका छन् । डेभलपरहरूले बुधबार दिउँसो ती कमजोरी सच्याउने प्याच सार्वजनिक गर्दै सबै प्रयोगकर्तालाई प्रणाली तत्काल अद्यावधिक गर्न आग्रह गरेका छन् ।‘सीभीई–२०२६–१०९६१८’ र ‘सीभीई–२०२६–१०९६१९’ नाम दिइएका यी कमजोरीको फाइदा उठाएर ह्याकरहरूले पासवर्ड नै नचाहिने गरी टाढैबाट सर्भरको नियन्त्रण लिन, सरकारी तथा गोप्य डाटाबेसमा पहुँच बनाउन र वेबसाइट बिगार्न सक्ने चेतावनी दिइएको छ । पीएचपी फाउन्डेसनले आफ्ना प्रयोगकर्तालाई तत्काल अपडेट लागू गर्न निर्देशन दिएको छ ।यी कमजोरी सुरक्षा कम्पनीहरू क्वालिस र विजले गत अगस्टमा एआई उपकरण प्रयोग गरी पत्ता लगाएका थिए । तय तालिकाभन्दा एक दिनअगावै मंगलबार यसबारे सूचना बाहिरिएपछि ह्याकरहरूले यसको दुरुपयोग गरी आक्रमण थालिसकेको क्लाउडफ्लेयरका प्रमुख प्रविधि अधिकृत डेन क्नेचले बताएका छन् ।जोखिम बढेपछि अस्ट्रेलिया, जापान तथा युरोपेली देशहरूले सम्भावित आक्रमण रोक्न सरकारी वेबसाइट अस्थायी रूपमा बन्द गरेका छन् । फ्रान्सको पेरिस प्रहरी, जर्मनीका सरकारी आईटी सेवा, बेल्जियमको विदेश मन्त्रालय र विकिपिडिया सञ्चालक विकिमिडिया फाउन्डेसनले समेत आफ्ना केही प्रणाली अस्थायी रूपमा बन्द गरेका छन् ।अमेरिकी राष्ट्रिय सुरक्षा एजेन्सीले तत्काल अद्यावधिक गर्न नसकिने अवस्थामा समस्या समाधान नभएसम्म प्रणाली नै अफलाइन राख्न सिफारिस गरेको छ भने ह्वाइट हाउसले आफ्ना निकायहरूलाई असरबारे मूल्याङ्कन गर्न लगाएको छ ।