साउदी अरबको पूर्वी सहर दमामस्थित किङ फहद अन्तर्राष्ट्रिय विमानस्थलमा भएको आक्रमणमा एक जनाको ज्यान गएको छ भने आठ जना घाइते भएका छन्। नागरिक उड्डयन प्राधिकरण (जीएसीए) ले बुधबार जारी गरेको विज्ञप्तिमार्फत केही घाइतेको अवस्था गम्भीर रहेको जनाएको छ। सबै घाइतेलाई तत्कालै अस्पताल पुर्याइएको प्राधिकरणले बताएको छ।
सोही दिन बिहान साउदी अरबको वायुरक्षा प्रणालीले शेइबा तेल क्षेत्रमा रहेको साउदी अरामकोको संरचनातर्फ आउँदै गरेको ड्रोनलाई खसालेको थियो। त्यस क्रममा दुई जनाको मृत्यु भएको ऊर्जा मन्त्रालयले पुष्टि गरेको छ।
यमनमा हुथी विद्रोही र साउदी समर्थनप्राप्त यमनी सरकारबीच द्वन्द्व चर्किँदै जाँदा साउदी विमानस्थल तथा तेल पूर्वाधारलाई लक्ष्य गरेर आक्रमणका घटना बढेका हुन्। गत साता अक्टोबर ११ मा रियादको किङ खालिद विमानस्थलमा भएको क्षेप्यास्त्र आक्रमणमा एक जनाको मृत्यु र ११ जना घाइते भएका थिए। त्यसको अघिल्लो दिन अक्टोबर १० मा भएको अर्को आक्रमणमा १२ जनाको ज्यान गएको र ३०० भन्दा बढी घाइते भएको प्राधिकरणले जनाएको थियो।
आक्रमणको शृङ्खला जारी रहँदै जाँदा अमेरिकाले साउदी अरबस्थित आफ्ना कूटनीतिक नियोगका कर्मचारी र उनीहरूका परिवारलाई देश छोड्न बुधबार आदेश दिएको छ। रोयटर्सले अमेरिकी अधिकारीहरूलाई उद्धृत गर्दै क्षेत्रका अन्य नियोगबाट पनि परिवारजनलाई फिर्ता लैजाने योजना रहेको उल्लेख गरेको छ। रियादस्थित अमेरिकी दूतावासले समेत सुरक्षा सतर्कता जारी गर्दै थप आक्रमणको सम्भावनाबारे चेतावनी दिएको छ।
