झापा । झापाको बिर्तामोड नगरपालिका–२, रामचोकस्थित एक ग्यारेजको क्यान्टिनमा बिहीबार बिहान लागेको आगोमा जलेर एक जनाको मृत्यु भएको छ । ध्रुव भट्टराईको जग्गामा सञ्चालित बडी ग्यारेजको क्यान्टिनमा बिहान करिब ४:१० बजे विद्युत् सर्ट भएर आगलागी भएको थियो ।
आगलागीमा परी क्यान्टिनमा काम गर्ने गौरीगञ्ज गाउँपालिका–२ निवासी ६५ वर्षीय रुद्रबहादुर तामाङको जलेर मृत्यु भएको जिल्ला प्रहरी कार्यालयले जनाएको छ । इलाका प्रहरी कार्यालय अनारमनीबाट खटिएको प्रहरी टोली, दमकल र स्थानीयवासीको प्रयासमा बिहान करिब ४:३० बजे आगो पूर्ण रूपमा नियन्त्रणमा आएको थियो ।
प्रारम्भिक विवरणअनुसार क्यान्टिनभित्रका भाँडाकुँडा, लत्ताकपडा, तीनवटा खसीबाख्रा र एक लाख रुपैयाँ नगदसहित करिब तीन लाख रुपैयाँ बराबरको क्षति भएको छ । आगोले सोही ग्यारेजसँगै जोडिएको राजेन्द्र अग्रवालको मार्बल तथा टाइल्स गोदाममा पनि सामान्य क्षति पुगेको प्रहरीले जनाएको छ । घटनाबारे थप अनुसन्धान भइरहेको छ ।
