काठमाडौं । दर्शकले एक दशकभन्दा लामो समयदेखि पर्खिरहेको नेपाली चलचित्र ‘कबड्डी–५’ शुक्रबारदेखि देशभरका हलमा प्रदर्शनमा आएको छ । रामबाबु गुरुङ निर्देशित यो फिल्मले प्रदर्शनको पहिलो दिनदेखि नै उल्लेख्य सङ्ख्यामा शो पाएको छ र हलहरूमा दर्शकको उपस्थिति उत्साहजनक देखिएको छ ।
वितरकहरूका अनुसार धेरै हलमा सुरुवाती शोका टिकट अग्रिम बिक्रीमै सकिएका छन् । प्रदर्शनको तीन दिनअघिदेखि नै अग्रिम टिकट बुकिङ खुला गरिएको थियो, जसमा दर्शकको उल्लेख्य चासो देखिएको हो । पहिलो ‘कबड्डी’ रिलिज भएको ठ्याक्कै १२ वर्षपछि आएको पाँचौँ शृङ्खलालाई ‘आफ्टर द फाइनल म्याच’ भनेर परिचय दिइएको छ ।
यो शृङ्खलाको केन्द्रमा काजीको विवाहको कथा छ । खेल सकिएपछि पनि कथा सकिएको छैन भन्ने सन्देश बोकेको यो फिल्ममा पुरानै पात्र र परिवेश छन्, तर कथाको आयाम भने नयाँ छ ।
वितरक र हल सञ्चालकहरू प्रदर्शनको सुरुवाती व्यापारप्रति खुसी देखिए पनि फिल्मको अन्तिम फैसला दर्शकको प्रतिक्रियाले नै गर्नेछ । हेरेर निस्किएका दर्शकको प्रतिक्रियाले यसले अघिल्ला शृङ्खलाजस्तै सफलता दोहोर्याउँछ वा होइन भन्ने टुङ्गो लाग्नेछ । त्यही प्रतिक्रियाले ‘कबड्डी’को यात्रा यहीँ रोकिने वा अर्को शृङ्खलाको घोषणा हुने भन्ने पनि तय गर्ने बताइएको छ । त्यसैले फिल्मको वास्तविक शक्ति नाप्न दुई–तीन दिन पर्खनुपर्ने देखिन्छ ।
