काठमाडौं — न्युजिल्यान्डको स्वास्थ्य मन्त्रालयमा पछिल्लो पाँच वर्षदेखि एकजना नेपाली प्रमुख सल्लाहकारको जिम्मेवारीमा छन्। पोखरा जन्मथलो भएका रमिल अधिकारीले सन् २०२० मा दुई चरणको छनोट प्रक्रिया पार गर्दै यो पद सम्हालेका हुन्। स्वास्थ्य नीति तयार गर्ने, योजनाको खाका कोर्ने र बनेका नीतिलाई कार्यान्वयनको तहसम्म पुर्याउने काम उनको मुख्य दायित्व हो।
रमिलका अनुसार मन्त्रालयमा यस्तो वरिष्ठ भूमिकामा कार्यरत आफू एक्ला नेपाली हुन्। परिवारसहित वेलिङ्टन नजिकको अपर हटमा बस्ने उनी आफ्नै पढाइ र सीपको क्षेत्रमा काम पाउनु आफ्ना लागि ठूलो अवसर भएको बताउँछन्। नेपालमा जस्तो स्रोत–सिफारिसको चलन त्यहाँ नचल्ने उनको अनुभव छ।
डायमन्ड बोर्डिङ स्कुलबाट एसएलसी र पोखरा माउन्ट अन्नपूर्णबाट विज्ञानमा प्लसटु गरेका रमिल सुरुमा चिकित्सक बन्ने तयारीमा थिए। बुबाको असामयिक निधनपछि पनि उनले चीनको सिन्स्याङ इन्टरनेसनल मेडिकल युनिभर्सिटीबाट चिकित्साशास्त्र पढे र नेपाल फर्केर ओम अस्पतालमा दुई वर्ष काम गरे। सन् २०१० मा जनस्वास्थ्यमा विशेषज्ञता हासिल गर्न उनी न्युजिल्यान्ड गए, जहाँ उनले आंशिक छात्रवृत्तिमा पढाइ सकेपछि साल्भेसन आर्मी–ओएसिसमा सार्वजनिक स्वास्थ्यकर्मीका रूपमा काम सुरु गरे।
सामुदायिक कामसँगै उनले सन् २०२२ र २०२५ मा स्थानीय तहको चुनावमा काउन्सिलर पदका लागि उम्मेदवारी पनि दिएका थिए। उनी पब्लिक हेल्थ एसोसिएसन अफ न्युजिल्यान्डका अध्यक्षसमेत हुन्। लेखन र संगीतमा रुचि राख्ने रमिलले गजल, गीत र कविता लेख्ने गरेका छन् भने कला–साहित्यतर्फ राष्ट्रिय स्तरका चारवटा अवार्ड जितिसकेको उनको भनाइ छ।
