६ कात्तिक, बुटवल । लुम्बिनी विकास कोषको उपाध्यक्षमा आनी छोइङ डोल्मालाई नियुक्ति गरिएपछि स्थानीयस्तरमा उठेको विरोध अझ चर्किएको छ । नियुक्ति फिर्ता नभएसम्म चरणबद्ध आन्दोलन जारी राख्ने घोषणा आन्दोलनकारीले गरेका छन् ।
लुम्बिनी बचाउ महाअभियानका संयोजक अक्रम खानका अनुसार आन्दोलनकारीहरूले लुम्बिनीको पर्साचोकमा विरोध प्रदर्शन गर्ने कार्यक्रम तय गरेका थिए । विभिन्न संघसंस्था तथा नागरिक समाजका प्रतिनिधिले डोल्माको नागरिकता र सम्पत्तिको वैधतामाथि प्रश्न उठाउँदै नियुक्ति खारेजको माग गरिरहेका छन् ।
कपिलवस्तु–तिलौराकोट संघर्ष समितिले सरकारलाई निर्णय सच्याउन आग्रह गरेको छ । समितिका राजकुमार यादवले सन् २०१९ मा हङकङबाट स्रोत नखुलेको १६ लाख ४९ हजार ९४० अमेरिकी डलर, करिब १८ करोड ३१ लाख रुपैयाँ, डोल्माको खातामा आएको दाबी गरेका छन् । उक्त रकम देखिएपछि नेपाल राष्ट्र बैंक र सम्पत्ति शुद्धीकरण अनुसन्धान विभागले खाता रोक्का गरी छानबिन अगाडि बढाएका थिए । तर राजनीतिक शक्ति र दबाब प्रयोग गरी अनुसन्धानलाई प्रभावित बनाइएको समितिको आरोप छ, जुन वित्तीय सुशासनका लागि अत्यन्त चिन्ताजनक भएको उसले जनाएको छ ।
समितिले आनीले आफ्नो आत्मकथा ‘फूलको आँखामा’ मा आफ्ना आमाबाबु तिब्बती शरणार्थीका रूपमा नेपाल आएको उल्लेख गरेको र नक्कली बुबा खडा गरेर किर्ते विवरणका आधारमा वंशजको नागरिकता लिएको गम्भीर प्रश्न पनि उठाएको छ ।
लुम्बिनीकै बासिन्दा पूर्वमन्त्री चन्द्रकेश गुप्ताले नागरिकतामा अस्पष्टता र विदेशबाट ठूलो परिमाणको रकम अपारदर्शी रूपमा खातामा आउनुका कारण डोल्मा विवादित पात्र बनेको र उनको नियुक्ति लुम्बिनीवासीका लागि स्वीकार्य नरहेको बताए । नियुक्ति खारेज नभए उनलाई लुम्बिनीमा बस्न नदिने र आन्दोलन चर्काउने चेतावनी उनले दिए ।
वरिष्ठ अधिवक्ता दिनेश त्रिपाठीले सुशासन, सार्वजनिक नैतिकता र कानुनी दृष्टिले यो नियुक्ति गलत भएको टिप्पणी गरेका छन् । आमाबाबु विदेशी नागरिक भएको आफैं स्वीकारेको अवस्थामा वंशजका आधारमा नागरिकता कसरी सम्भव हुन्छ भन्ने प्रश्न उठाउँदै उनले राष्ट्रियताको प्रश्न टुंगो नलाग्दै नियुक्ति दिनु अनुचित भएको बताए ।
विश्वभरका बौद्ध धर्मावलम्बीको आस्थाको केन्द्रसँग जोडिएको संवेदनशील संस्थाको नेतृत्व चयन गर्दा पारदर्शिता र प्रतिष्ठालाई बेवास्ता गर्दै आवेदन नदिएकी विवादित व्यक्तिलाई नियुक्ति दिनु खेदजनक भएको संघर्ष समितिको भनाइ छ ।
