चितवन, ६ कात्तिक । दशैंको टीका सकिएलगत्तै चितवनका प्रमुख पर्यटकीय ठाउँहरूमा स्वदेशी र विदेशी पर्यटकहरूको भीड बढेको छ । सौराहा, पटिहानी र मेघौलीजस्ता क्षेत्रका होटल तथा रेस्टुरेन्टमा पछिल्ला दुई दिनमा बुकिङ ह्वात्तै बढेको व्यवसायीहरूले बताएका छन् । प्रमुख गन्तव्यहरूमा होटल अकुपेन्सी ८० प्रतिशतभन्दा माथि पुगेको छ ।
देशकै तेस्रो ठूलो पर्यटकीय गन्तव्य मानिने सौराहामा १३६ वटा होटलमा ६ हजार २०० शय्या छन् । क्षेत्रीय होटल संघ सौराहाका महासचिव महेश खनालका अनुसार दशैंअघि ३० प्रतिशत हाराहारीमा रहेको अकुपेन्सी टीकापछि ८० प्रतिशतभन्दा माथि पुगेको छ । नेपालीसँगै चिनियाँलगायत विदेशी पर्यटक पनि बढेको उनले बताए ।
रेस्टुरेन्ट एन्ड बार एसोसिएसन (रेवान) सौराहाका महासचिव नविन नेपालले लामो समयदेखि मन्दीमा रहेको रेस्टुरेन्ट व्यवसाय दशैंपछि चलायमान बनेको बताए । पर्यटन व्यवसायी बासु ढुंगानाका अनुसार भदौ र असोजको बाढीले मठमातिएको माहोलमा दशैंले सकारात्मक सोच जगाएको छ । उनको वनबास होटलमा तीन दिनदेखि ९० प्रतिशतभन्दा बढी कोठा बुक छन् ।
पटिहानीको सोल्टी वेस्टइन्ड रिसोर्ट पछिल्ला दुई दिनदेखि थप तीन दिनसम्म पुरै भरिएको छ । रिसोर्टका जनरल म्यानेजर चोपलाल पाण्डेका अनुसार ५२ वटै कोठामा नेपाली र विदेशी पर्यटक बसेका छन् । त्यस्तै मेघौलीका सिद्धार्थ वाइल्डलाइफ रिसोर्ट र बाराही जंगल लज पनि दुई दिनदेखि सोल्ड आउट छन् ।
चितवन राष्ट्रिय निकुञ्जका अनुसार गत आर्थिक वर्ष २०८२/८३ मा निकुञ्जमा २ लाख ७२ हजार ९२३ पर्यटक घुमेका थिए, जसमध्ये नेपाली १ लाख ६१ हजार ३७५ थिए । अघिल्लो वर्षको तुलनामा नेपाली पर्यटकको संख्या ४४ हजार १६९ ले बढेको छ ।
