अर्थमन्त्री डा. स्वर्णिम वाग्ले तीन दिने आधिकारिक भ्रमणका लागि भारतको राजधानी नयाँ दिल्ली पुगेका छन्। उनी बिहीबार बिहान १० बजे एयर इन्डियाको नियमित उडानमार्फत दिल्ली प्रस्थान गरेका हुन्।
भ्रमण दल दुई सदस्यीय छ — अर्थमन्त्री वाग्लेसँगै उनका प्रमुख स्वकीय सचिव नवीन ढुङ्गाना पनि दिल्ली गएका छन्। इन्दिरा गान्धी अन्तर्राष्ट्रिय विमानस्थलको विशिष्ट कक्षमा भारतका लागि नेपाली कार्यवाहक राजदूत सुरेन्द्र थापाले अर्थमन्त्री वाग्लेलाई स्वागत गरेका थिए।
भारतीय टेलिभिजन च्यानल एनडीटीभीको ‘एनडीटीभी वर्ल्ड समिट २०२६’ को उच्चस्तरीय प्यानलमा अतिथि तथा वक्ताका रूपमा सम्बोधन गर्ने उद्देश्यले वाग्ले दिल्ली गएका हुन्।
समिटअन्तर्गत बिहीबार साँझ आयोजना हुने विशेष सम्बोधन सत्रमा उनी अतिथिका रूपमा सहभागी हुनेछन्। उक्त सत्रमा भारतीय प्रधानमन्त्री नरेन्द्र मोदी र विदेशमन्त्री डा. एस. जयशङ्करले सम्बोधन गर्नेछन्।
यस्तै शुक्रबार बिहान सवा ११ बजे समिटकै एक सत्रमा सहभागी भएर अर्थमन्त्री वाग्लेले सम्बोधन गर्नेछन्। ‘निकटताबाट समृद्धि : भारत–नेपाल अवसर’ विषयमा आयोजना हुने उक्त अन्तरक्रियात्मक सत्रमा उनी प्रमुख वक्ताका रूपमा प्रस्तुत हुने कार्यतालिका छ।
अर्थमन्त्री वाग्ले शनिबार स्वदेश फर्किने कार्यक्रम रहेको छ।
