वाशिङ्टन । हलिउडका चर्चित अभिनेता टम स्केरिटको निधन भएको छ । ९३ वर्षको उमेरमा उनको निधन भएको हो । ‘एलियन’ र ‘टप गन’ जस्ता प्रसिद्ध फिल्ममा सम्झनलायक भूमिकाका कारण उनी दर्शकमाझ लोकप्रिय थिए ।
निर्देशक रिड्ली स्कटको चर्चित साइन्स फिक्सन–हरर फिल्म ‘एलियन’ (१९७९) मा स्केरिटले अन्तरिक्षयान नोस्ट्रोमोका कप्तान डलासको भूमिका निभाएका थिए । सन् १९८६ मा आएको ब्लकबस्टर ‘टप गन’ मा भने उनले नौसेनाको लडाकु विमान प्रशिक्षण विद्यालयका प्रमुख प्रशिक्षक कमान्डर माइक भाइपरको भूमिका निर्वाह गरेका थिए ।
छ दशक लामो अभिनय यात्रामा स्केरिटले ठूलो पर्दा र टेलिभिजन दुवैतर्फ सशक्त पहिचान बनाएका थिए । रोबर्ट अल्टम्यान निर्देशित ‘म्यास’ (१९७०) मा उनले शल्यचिकित्सक ड्युक फरेस्टको भूमिका खेलेका थिए । त्यस्तै ‘अ रिभर रनस थ्रु इट’ (१९९२) मा पादरी र सन् २०१२ को कमेडी ‘टेड’ मा पनि उनले अभिनय गरेका थिए ।
टेलिभिजन शृङ्खला ‘पिकेट फेन्सेस’ मा जिम्मी ब्रोकको भूमिकाका लागि उनी सन् १९९३ मा एमी अवार्डबाट सम्मानित भएका थिए । विविध भूमिकामार्फत स्केरिटले फिल्म र टेलिभिजन क्षेत्रमा अविस्मरणीय छाप छाडेका छन् ।
