झापा । भारतसँग सीमा जोडिएका झापाका विभिन्न क्षेत्रबाट अवैध रूपमा भित्र्याइँदै गरेका करिब ४० लाख रुपैयाँ मूल्यका फूलमाला सशस्त्र प्रहरीले नियन्त्रणमा लिएको छ । सशस्त्र प्रहरी बल नेपाल नं २ गण भद्रपुरको गस्ती तथा चेकजाँच टोलीले दुई दिनको अवधिमा रु ३९ लाख ७८ हजार ७०० बराबरका भारतीय फूलमाला बरामद गरेको हो ।
गणपति सचिन कर्माचार्यका अनुसार सोमबार रु २५ लाख ६३ हजार ४०० र मंगलबार रु १४ लाख १५ हजार ३०० मूल्यका फूलमाला बरामद गरिएका हुन् । काँकडभिट्टा, भद्रपुर र केचनालगायतका सीमावर्ती नाकाबाट नेपालतर्फ ल्याउँदै गरेको अवस्थामा ती सामग्री नियन्त्रणमा लिइएको उनले बताए ।
जिल्ला प्रशासन कार्यालय झापाले यस वर्षको पर्वमा भारतबाट फूलमाला आयातमा रोक लगाएको छ । प्रशासनले पर्वमा स्वदेशी फूल प्रयोग गर्न सर्वसाधारणलाई आग्रह गर्दै आएको छ । अवैध रूपमा भित्र्याइएका फूलमाला नियन्त्रणमा लिन प्रशासनले सुरक्षा निकायलाई निर्देशन दिएको थियो । सोही निर्देशनका आधारमा सीमा क्षेत्रमा निगरानी बढाइएको हो ।
बरामद गरिएका फूलमाला जिल्ला प्रशासन कार्यालय, नेपाल प्रहरी, प्लान्ट क्वारेन्टिन, जनप्रतिनिधि तथा उद्योग वाणिज्य सङ्घका प्रतिनिधिको उपस्थितिमा नष्ट गरिएको छ ।
